پشاور — ایڈیشنل آئی جی احسن عباس نے کہا ہے کہ پولیس نے پشاور میں ایک کارروائی کے دوران افغان باشندے حکمت اللہ عرف حمزہ کو گرفتار کیا ہے۔ علاقائی ترقیاتی کونسل کے مشیر محمود جان بابر نے مشترکہ پریس کانفرنس میں الزام لگایا کہ گرفتار شخص پاکستان میں دہشت گردی کی منصوبہ بندی کر رہا تھا۔
احسن عباس کے مطابق گرفتار شخص تین ماہ کی تربیت حاصل کر چکا ہے اور گل بہادر سمیت دیگر مبینہ دہشت گردوں کے ساتھ رہ چکا ہے۔ انہوں نے کہا کہ تفتیش کے دوران پاکستان میں اس کے مبینہ سہولت کاروں کے بارے میں معلومات سامنے آئی ہیں اور تفتیش جاری ہے۔
دونوں حکام نے الزام لگایا کہ افغانستان کی سرزمین پاکستان کے خلاف استعمال ہو رہی ہے۔ ایڈیشنل آئی جی نے کہا کہ سیکیورٹی کی صورتِ حال کے پیشِ نظر 12 اضلاع پر خصوصی توجہ دی جا رہی ہے اور ڈرون کے استعمال کی روک تھام کے لیے بھی اقدامات کیے جا رہے ہیں۔
