انسداد پولیو مہم۔صوبائی دارلحکومت پشاور میں سات روزہ انسداد پولیومہم میں 866603 بچوں کو پولیو سے بچاؤ کے قطرے پلائے جائیں گے۔ صوبائی دارلحکومت پشاورمیں ضلعی انتظامیہ کی زیر نگرانی سات روزہ انسداد پولیو مہم 23 مئی سے 29 مئی تک جاری رہے گی۔ ڈپٹی کمشنر پشاور شفیع اللہ خان نے سول ڈسپنسری شاہین مسلم ٹاؤن میں بچوں کو انسداد پولیو کے قطرے پلا کر مہم کا باقاعدہ آغاز کیا۔ ڈپٹی کمشنر پشاور نے علاقے کا دورہ کرتے ہوئے انکاری والدین کو قائل کرتے ہوئے بچوں کو انسداد پولیو قطرے بھی پلوائے۔
اس موقع پر ڈپٹی کمشنر پشاور شفیع اللہ خان نے تفصیلات بتاتے ہوئے کہا کہ صوبائی دارلحکومت پشاور میں ضلعی انتظامیہ کی زیر نگرانی آج 23 مئی سات روزہ انسداد پولیو مہم شروع ہو گئی ہے جو کہ 29 مئی تک جاری رہے گی۔ مہم کے دوران پشاور بھر میں 866603 بچوں کو انسداد پولیو قطرے پلائے جائیں گے جس کے لیے 2496ٹیمیں پشاور کے مختلف علاقوں میں بچوں کو پولیو سے بچاؤ کے قطرے پلانے میں مصروف ہے اور ان ٹیموں کی سیکیورٹی کا بھی خاطر خواہ بندوبست کیا گیا ہے۔ڈپٹی کمشنرپشاورشفیع اللہ خان نے والدین سے اپیل کی ہے کہ اپنے بچوں کو مستقل معذوری سے بچانے کے لیے پولیو سے بچاؤ کے قطرے ضرور پلائیں اور پولیو ٹیموں سے تعاون کریں تاکہ پشاور سے پولیو وائرس کا خاتمہ کیا جا سکے۔ انہوں نے کہا کہ ہمیں پولیو کے خاتمے کے لیے اپنا کردار ادا کر نا ہو گا اور ہماری مشترکہ کوششوں سے ہی پولیو کا خاتمہ ممکن ہو سکے گا۔
