وزیر تعلیم فیصل خان ترکئی نے بورڈ سربراہان اجلاس کے دوران ہدایت کی کہ تمام طلباء و طالبات کو نزدیکی علاقوں میں امتحانی سنٹرز دئیے جائیں۔ ریزیڈنٹ انسپکٹرز پر لازم کروایا جائے کہ وہ امتحانی ہال اور سکول کے باہر نظم و ضبط برقرار رکھیں اور کوئی غیر متعلقہ شخص وہاں موجود نہ ہو۔ تمام ڈسٹرکٹ ایجوکیشن آفیسرز، ضلعی انتظامیہ اور مانیٹرنگ اتھارٹی حکام امتحانات کے انعقاد اور مانیٹرنگ میں اپنا مثبت کردار ادا کریں۔
صو بائی وزیر تعلیم کا کہنا تھا کہ امتحانی نظام میں مثبت اصلاحات لائی گئی ہیں۔جن کے تحت سرکاری اور نجی سکولوں کے طلبہ و طالبات ایک ہی ہال میں امتحانات دے رہے ہیں۔ انہوں نے ان خیالات کا اظہار صوبہ بھر کے تعلیمی بورڈ سربراہان کے آن لائن اجلاس کی صدارت کرتے ہوئے کہا تمام بورڈز میں نگران عملے کی تعیناتی بذریعہ قرعہ اندازی کی گئی ہے۔ مانیٹرنگ کے عمل کو بہتر بنانے کیلئے تمام امتحانی مراکز میں سی سی ٹی وی کیمرے نصب ہیں جو متعلقہ بورڈز سے منسلک ہیں۔ امتحانی ہالوں کے احاطے میں دفعہ 144 نافذ ہے اور نقل کے مکمل خاتمے کیلئے تمام سٹیک ہولڈرز کی معاونت لی گئی ہے۔ انہوں نے کہا کہ امسال میٹرک امتحانات شفافیت اور میرٹ کے لحاظ سے بہترین تھے اور 7 مئی سے شروع ہونے والے ایف اے، ایف ایس سی امتحانات کیلئے بھی تمام تر انتظامات مکمل ہیں۔
اجلاس میں سیکرٹری ایجوکیشن مسعود احمد، سپیشل سیکرٹری قیصر عالم اور تمام بورڈ سربراہان نے آن لائن شرکت کی۔انہوں نے بورڈ انتظامیہ اور محکمہ تعلیم کو ہدایت دی کہ امتحانات کے دوران پیپرز لیک کرنے یا دوسری قسم کی غلطی کرنے والوں کے خلاف ای اینڈ ڈی رولز کے مطابق کارروائیکی جا ئی گی ۔ انہوں نے میٹرک امتحانات میں کی گئی کاروائیوں کی بورڈ وائز تفصیلات طلب کیں اور ہدایت کی کہ شروع ہونے والے ایف اے/ایف ایس سی امتحانات کی روزانہ کی بنیاد پر رپورٹ ہر بورڈ فراہم کرنے کا پابند ہوگا۔
وزیر تعلیم نے ضلعی انتظامیہ کو پاکٹ گائیڈ (نقل کی پرچیوں) کے خلاف کارروائی کرنے اور امتحانی ہالز کے اندر گن مین، اسلحہ لانے اور تصاویر بنانے پر پابندی پر سختی سے عمل درآمد کروانے کی ہدایت کی۔ انہوں نے امتحانی عملے پر زور دیا کہ وہ طلباء و طالبات کو اعتماد دیں، ان کے حقوق کا خیال رکھیں اور ان کے ساتھ شفقت سے پیش آئیں تاکہ وہ بہترین کارکردگی کا مظاہرہ کر سکیں۔ انہوں نے بورڈز کو ایک دوسرے کے تجربات سے فائدہ اٹھانے اور بہترین اصلاحات نافذ کرنے کی بھی ہدایت کی۔ڈسٹرکٹ ایجوکیشن آفیسرز کو متعلقہ بورڈ کے ساتھ روابط رکھنے اور نگران عملے کی تعیناتی میں معاونت کرنے کی ہدایت کی گئی۔ وزیر تعلیم نے مارکنگ کے مرحلے میں شامل اہلکاروں کو بھی تربیت فراہم کرنے پر زور دیا تاکہ میرٹ پر طلبہ و طالبات کو ان کا حق مل سکے۔
