بھارتی جارحیت کے تناظر میں خیبر پختونخوا حکومت نے ایک جامع ایڈوائزری جاری کرتے ہوئے تمام متعلقہ اداروں کو فوری ہنگامی تیاریوں کا حکم دے دیا ہے۔ صوبائی حکومت کے احکامات کے تحت تمام فیلڈ فارمیشنز، ایمرجنسی سروسز، لائن ڈیپارٹمنٹس، اور حساس اداروں کو صوبائی ہنگامی فریم ورک کے تحت پیشگی تیاری کے پروٹوکول فوری طور پر فعال کرنے کی ہدایت کی گئی ہے۔

ضلعی انتظامیہ کو الرٹ
تمام اضلاع میں ڈپٹی کمشنرز کو ہدایت دی گئی ہے کہ ضلعی ایمرجنسی کوآرڈینیشن کمیٹیاں (DECCs) فوری فعال کی جائیں۔ ان کمیٹیوں میں پولیس، صحت، ریسکیو 1122، بلدیاتی ادارے، سول ڈیفنس، تعلیم، اور میڈیا فوکل پرسنز شامل ہوں گے۔ ہر تحصیل میں مخصوص پناہ گاہیں (اسکول، کمیونٹی ہالز، مساجد) شناخت اور تیار کی جائیں گی۔ اس کے ساتھ ساتھ ایمرجنسی ریلیف کٹس، عوامی ریکارڈز، اور ایندھن کے ذخائر کی حفاظت یقینی بنانے پر زور دیا گیا ہے۔ تمام انتظامی عملے کی چھٹیاں منسوخ کر دی گئی ہیں۔

ریسکیو اور ایمرجنسی سروسز کو الرٹ موڈ میں رکھنے کا حکم
ریسکیو 1122، فائر بریگیڈ، اور واٹر ریسکیو یونٹس کو مکمل طور پر آپریشنل رکھا جائے گا۔ ممکنہ خطرے والے علاقوں میں فوری ردعمل ٹیموں کی تعیناتی کی جائے گی۔ سول ڈیفنس کے ساتھ مل کر مشقیں کروانے کی ہدایت بھی دی گئی ہے۔

صحت کا شعبہ بھی تیار
تمام ہسپتالوں، بیسک ہیلتھ یونٹس، اور ٹراما سینٹرز کو ہنگامی صورتحال سے نمٹنے کے لیے تیار رہنے کا حکم دیا گیا ہے۔ سرجیکل کٹس، اینٹی بایوٹکس، جلنے کے علاج کا سامان، اور خون کی دستیابی یقینی بنائی جائے گی۔ ڈاکٹرز اور پیرا میڈیکل اسٹاف کی 24 گھنٹے ڈیوٹی روٹیشن کا نظام فعال کیا گیا ہے۔

تعلیم، پولیس، اور سول ڈیفنس کا کردار
تمام اسکولوں میں غیر ضروری سرگرمیاں ملتوی کرنے کا حکم دیا گیا ہے۔ اسکول عمارات کو پناہ گاہ یا فیلڈ ہسپتال کے طور پر استعمال کے لیے تیار رکھا جائے گا۔ سول ڈیفنس کو فضائی حملوں کے سائرن، بلیک آؤٹ پروٹوکولز، اور ابتدائی طبی امداد کی آگاہی مہم شروع کرنے کی ہدایت دی گئی ہے۔

پولیس اور قانون نافذ کرنے والے ادارے حساس تنصیبات، پلوں، ایندھن اسٹیشنز، اور فوجی تنصیبات کے اطراف گشت میں اضافہ کریں گے۔

اشیائے خوردونوش و ایندھن کی دستیابی
ڈپٹی کمشنرز کو ہدایت دی گئی ہے کہ وہ ضروری اشیاء کی سپلائی چین کو فعال رکھیں اور ذخیرہ اندوزی یا ناجائز منافع خوری کے خلاف کریک ڈاؤن کریں۔ فیول اسٹیشنز کے ساتھ رابطہ رکھ کر ایندھن کے ذخائر کو محفوظ بنایا جائے گا۔

عوامی شمولیت اور معلومات کا مؤثر نظام
ویلیج و نیبرہڈ کمیٹیاں (VNCs) کو فعال اور ریڈ کریسنٹ، اسکاؤٹس، و دیگر رضاکار تنظیموں کو متحرک کیا جائے گا۔ افواہوں کے انسداد، مصدقہ معلومات کی ترسیل اور عوامی اعتماد برقرار رکھنے کے لیے میڈیا فوکل پرسنز کے ذریعے اطلاعات جاری ہوں گی۔

حکمرانی کے تسلسل کے اقدامات
کمشنرز اور ڈپٹی کمشنرز کو ہدایت دی گئی ہے کہ وہ کمانڈ افسران نامزد کریں اور عملے کے لیے محفوظ مقامات سے کام کرنے کے منصوبے تیار کریں۔

حکومت کا وضاحتی مؤقف
صوبائی حکومت کا کہنا ہے کہ یہ اقدامات صرف اسٹریٹجک تیاری کے تحت کیے جا رہے ہیں، اور اس وقت کوئی فوری خطرہ لاحق نہیں۔ عوام سے اپیل کی گئی ہے کہ وہ پرسکون، چوکنا، اور حکومتی اقدامات میں مکمل تعاون پر مبنی رویہ اپنائیں۔

تمام محکموں کو روزانہ کی تیاریوں کی رپورٹ صوبائی ہوم ڈیپارٹمنٹ کے کنٹرول روم کو ارسال کرنے کی ہدایت بھی دی گئی ہے، جو چوبیس گھنٹے فعال رہے گا۔