اقلیتوں کے مسائل ترجیحی بنیادوں پر حل کیے جائینگے۔ آئی جی خیبر پختونخواہ پولیس ذوالفقار حمید
آئی جی پی خیبر پختونخوا ذوالفقار حمید کی اقلیتی وفد سے ملاقات، اقلیتوںکے مسائل کے فوری حل کے احکامات جاری۔
وزیر اعلیٰ کے فوکل پرسن اور سابقہ مشیربرائے اقلیتی امور وزیر زادہ کی قیادت میں آنے والےاقلیتی وفد نے آئی جی پی ذوالفقار حمید کی اقلیتوں کے مسائل کے حل میں خصوصی دلچسپی کو سراہا۔
آج یہاں، اقلیتی امور کے لیے وزیر اعلیٰ خیبر پختونخوا کے فوکل پرسن اور سابقہ مشیر، وزیر زادہ کی قیادت میں ایک 5 رکنی وفد نے انسپکٹر جنرل آف پولیس خیبر پختونخوا، جناب ذوالفقار حمید سے ان کے دفتر میں ملاقات کی۔ ملاقات کے دوران وفد نے صوبے میں اقلیتی برادری کو درپیش مسائل اور ان کے دیرپا حل کے حوالے سے تفصیلی تبادلہ خیال کیا۔وفد نے آئی جی پی کو اقلیتوں کو درپیش چیلنجز، بالخصوص سکیورٹی خدشات سے آگاہ کیا۔ انہوں نے اقلیتی برادریوں کی حفاظت اور ان کے مقدس مقامات اور عبادت گاہوں کے تحفظ کو یقینی بنانے کی ضرورت پر زور دیا۔
ٓ آئی جی پی خیبر پختونخوا جناب ذوالفقار حمید نے وفد کے تحفظات کو بغور سنا اور انہیں یقین دلایا کہ خیبر پختونخوا پولیس اقلیتوں کے حقوق کے تحفظ اور ان کے مسائل کے حل کے لیے پرعزم ہے۔ انہوں نے موقع پر ہی متعلقہ حکام کو درپیش مسائل کے فوری حل کے لیے جامع اقدامات کے احکامات جاری کیے۔
آئی جی پی نے مزید کہا کہ اقلیتوں کی حفاظت اور ان کے مقدس مقامات اور عبادت گاہوں کی مکمل سکیورٹی کو یقینی بنانے کے لیے ہر ممکنہ اقدامات کئے جا رہے ہیں۔ انہوں نے وفد کو یقین دلایا کہ اقلیتوں کی جان و مال کے تحفظ کو یقینی بنانا خیبر پختونخوا پولیس کی ترجیحات میں شامل ہے۔ انہوں نے مزید کہا کہ خیبر پختونخواہ پولیس اقلیتوں کے تحفظ میں ہمہ وقت مصروف ہے اور اس مقصد کیلئے اقلیتی نمائندوں سے مستقبل میں بھی تعاون جاری رکھیں گے۔وفد نے بھی آئی جی پی کے فوری ردعمل اور مسائل کے حل کے لیے ان کے تعاون پر ان کی تعریف کی اور ان کا شکریہ اداکیا۔
