پروینشل ڈیزاسٹر مینجمنٹ اتھارٹی (پی ڈی ایم اے) خیبرپختونخوا نے تیز بارشوں اور آسمانی بجلی گرنے کے باعث جانی و مالی نقصانات کی رپورٹ جاری کر دی ہے۔
پی ڈی ایم اے کے مطابق گزشتہ 24 گھنٹوں کے دوران مختلف حادثات میں 6 افراد جاں بحق جبکہ ایک بچہ زخمی ہوا۔ جاں بحق ہونے والوں میں ایک مرد، ایک خاتون اور چار بچے شامل ہیں۔
رپورٹ کے مطابق بارش اور اچانک آنے والے سیلابی ریلوں کے نتیجے میں تین گھروں کو جزوی نقصان بھی پہنچا ہے۔ یہ حادثات خیبر، ملاکنڈ، کوہاٹ اور باجوڑ کے اضلاع میں پیش آئے۔
پی ڈی ایم اے نے متاثرہ اضلاع کی انتظامیہ کو فوری امدادی کارروائیوں کی ہدایت دیتے ہوئے کہا ہے کہ متاثرہ خاندانوں کو فوری ریلیف اور زخمیوں کو بہترین طبی سہولیات فراہم کی جائیں۔
ادارے نے خبردار کیا ہے کہ بارشوں کا سلسلہ 17 جولائی تک جاری رہنے کا امکان ہے، جس کے پیشِ نظر ضلعی انتظامیہ کو پہلے ہی الرٹ رہنے اور پیشگی اقدامات اٹھانے کی ہدایات جاری کی جا چکی ہیں۔
پی ڈی ایم اے کے ترجمان کے مطابق ایمرجنسی آپریشن سنٹر مکمل طور پر فعال ہے اور عوام سے اپیل کی گئی ہے کہ کسی بھی ناخوشگوار واقعے کی فوری اطلاع ہیلپ لائن 1700 پر دیں۔ اتھارٹی تمام ضلعی انتظامیہ اور امدادی اداروں کے ساتھ مسلسل رابطے میں ہے۔
