ڈسٹرکٹ پولیس آفیسر چارسدہ محمد وقاص خان کی ہدایات پر ڈی ایس پی ٹریفک چارسدہ شہنشاہ گوہر خان کی نگرانی میں ضلع کے مختلف اہم روٹس مردان روڈ، نوشہرہ روڈ، تنگی روڈ اور پشاور روڈ کا تفصیلی دورہ کیا گیا۔ اس دوران ڈبل پارکنگ، تجاوزات اور ٹریفک قوانین کی خلاف ورزیوں کے خلاف مؤثر کارروائیاں عمل میں لائی گئیں۔ کارروائی کے دوران سڑکوں کے کنارے اور فٹ پاتھوں پر سامان رکھ کر عوام الناس کے آمدورفت میں رکاوٹ بننے والے افراد کو ہٹایا گیا۔ مذکورہ افراد کو چوکی ٹریفک منتقل کیا گیا جہاں انہوں نے آئندہ راستہ عام اور فٹ پاتھ پر رکاوٹ نہ بننے کی یقین دہانی کروائی۔ تمام افراد کو سخت وارننگ جاری کی گئی۔ بعد ازاں ڈی ایس پی ٹریفک شہنشاہ گوہر خان نے سب جیل چارسدہ کے اردگرد موجود تجاوزات کا بھی جائزہ لیا اور جیل آفسران سے ملاقات کی۔ ملاقات میں ٹریفک کی روانی، سیکیورٹی اور نظم و ضبط سے متعلق امور پر تبادلہ خیال کیا گیا۔ ڈی ایس پی ٹریفک شہنشاہ گوہر خان نے کہا کہ شہریوں کی سہولت اور ٹریفک کی روانی کو برقرار رکھنے کے لیے تجاوزات اور ٹریفک قوانین کی خلاف ورزیوں کے خلاف کارروائیاں بلا تفریق جاری رہیں گی۔ عوام سے اپیل ہے کہ وہ قانون کی پاسداری کریں اور ٹریفک پولیس سے تعاون کریں۔