خیبرپختونخوا کلچر اینڈ ٹورازم اتھارٹی نے دیر لوئر کے خوبصورت سیاحتی مقام لڑم سر پر سیاحوں کے لیے جدید کیمپنگ پاڈز نصب کرنے کا فیصلہ کیا ہے، جس سے علاقے میں سیاحت کے فروغ اور مقامی سطح پر روزگار کے نئے مواقع پیدا ہونے کی توقع ہے۔
اس سلسلے میں خیبرپختونخوا کلچر اینڈ ٹورازم اتھارٹی اور لڑم سر کے مقامی اراضی مالکان کے درمیان مفاہمتی یادداشت (ایم او یو) پر دستخط کیے گئے۔ تقریب سابق صوبائی وزیر ہمایون خان اور سیکرٹری محکمہ سیاحت، ثقافت، آثار قدیمہ و عجائب گھر خیبرپختونخوا سعادت حسن کی نگرانی میں منعقد ہوئی۔
معاہدے پر اتھارٹی کی جانب سے ڈائریکٹر انویسٹمنٹ محمد علی سید جبکہ مقامی اراضی مالکان کی نمائندگی اول خان نے کی۔
اس موقع پر سیکرٹری سیاحت سعادت حسن نے بتایا کہ منصوبے کے تحت اقوام متحدہ کے ترقیاتی پروگرام (یو این ڈی پی) کے تعاون سے لڑم سر میں جدید سہولیات سے آراستہ کیمپنگ پاڈز نصب کیے جائیں گے تاکہ سیاحوں کو بہتر اور محفوظ رہائش فراہم کی جا سکے۔
انہوں نے کہا کہ خیبرپختونخوا اپنی قدرتی خوبصورتی، دلکش وادیوں اور مہمان نواز عوام کی وجہ سے سیاحت کے بے پناہ امکانات رکھتا ہے، اور حکومت ان مقامات کو جدید سہولیات سے آراستہ کر کے ملکی و غیر ملکی سیاحوں کو راغب کرنے کے لیے اقدامات کر رہی ہے۔
سعادت حسن کے مطابق اس منصوبے سے نہ صرف لڑم سر کی کشش میں اضافہ ہوگا بلکہ ہوٹلنگ، ریسٹورنٹس اور دیگر کاروباری سرگرمیوں کو بھی فروغ ملے گا، جس سے مقامی آبادی کے لیے روزگار کے مواقع پیدا ہوں گے۔
حکام کا کہنا ہے کہ دیر لوئر کے سیاحتی مقامات کی ترقی حکومت کی ترجیحات میں شامل ہے اور لڑم سر منصوبہ اسی سلسلے کی ایک اہم کڑی ہے۔ مقامی افراد نے بھی اس اقدام کو خوش آئند قرار دیتے ہوئے امید ظاہر کی ہے کہ اس سے علاقے کی خوبصورتی اجاگر ہونے کے ساتھ معاشی سرگرمیوں میں اضافہ ہوگا۔
