مانسہرہ: پانچ ماہ سے زائد عرصے کے وقفے کے بعد مشہور سیاحتی مقام جھیل سیف الملوک تک جانے والی سڑک کو بحال کرنے کے لیے کام کا باقاعدہ آغاز کر دیا گیا ہے۔ کاغان ڈویلپمنٹ اتھارٹی (کے ڈی اے) کے ڈائریکٹر جنرل رحمت علی کی ہدایت پر سیاحوں کی رسائی ممکن بنانے کے لیے عملی اقدامات جاری ہیں۔
کے ڈی اے نے بھاری مشینری کی مدد سے سڑک پر جمی برف، گلیشیئرز اور دیگر رکاوٹوں کو ہٹانے کا عمل شروع کر دیا ہے۔ برف پوش پہاڑوں کے دامن میں واقع جھیل سیف الملوک اس وقت مکمل طور پر برف سے ڈھکی ہوئی ہے اور دلکش مناظر پیش کر رہی ہے، جس کے باعث سیاحوں کی دلچسپی میں اضافہ متوقع ہے۔
کے ڈی اے کے بلڈنگ انسپکٹر زیشان خان کے مطابق ناران سے جھیل تک تقریباً 11 کلومیٹر طویل سڑک پر چھوٹے بڑے گلیشیئرز سمیت متعدد رکاوٹیں موجود ہیں، تاہم اب تک تقریباً پانچ کلومیٹر راستہ صاف کر لیا گیا ہے۔
انہوں نے مزید بتایا کہ اگر آئندہ دنوں میں موسم سازگار رہا تو ایک ہفتے کے اندر فور ویل ڈرائیو گاڑیوں کے لیے جھیل تک رسائی بحال کر دی جائے گی، جس کے بعد سیاح برف سے ڈھکی جھیل کے حسین مناظر سے لطف اندوز ہو سکیں گے۔
