کمشنر پشاور ڈویژن کیپٹن (ر) خالد محمود کی زیرِ صدارت عوامی سہولیات میں بہتری اور سرکاری خدمات کی مؤثر فراہمی کے حوالے سے اہم اجلاس منعقد ہوا، جس میں صوبائی حکومت کی ہدایات کے مطابق 100 روزہ خصوصی مہم کے تحت متعدد اقدامات کا فیصلہ کیا گیا۔ اجلاس میں ڈپٹی کمشنرز پشاور اور قبائلی ضلع خیبر، چیف ایگزیکٹو WSSP، ڈسٹرکٹ ہیلتھ آفیسر پشاور، ایڈیشنل کمشنر پشاور، ریجنل میونسپل آفیسر اور متعلقہ محکموں کے افسران نے شرکت کی۔
اجلاس میں پشاور کے شہری و دیہی علاقوں میں ملبے اور کوڑے کی فوری صفائی، ندی نالوں اور بند سیوریج لائنوں کی صفائی، جبکہ کھلے مین ہولز کی نشاندہی کے لیے 24 گھنٹوں میں سروے مکمل کرکے رپورٹ پیش کرنے کی ہدایت کی گئی۔ غیر قانونی اسپیڈ بریکرز، خطرناک بل بورڈز، غیر قانونی کرش پلانٹس اور آلودگی پھیلانے والے بھٹہ خشت کے خلاف کارروائی، تعمیراتی ملبہ ہٹانے اور ماحولیاتی آلودگی پر قابو پانے کے اقدامات بھی طے کیے گئے۔ سرکاری دفاتر میں صفائی، ناکارہ اشیاء اور غیر استعمال شدہ گاڑیوں کی قواعد کے مطابق نیلامی، عوامی مقامات پر بنیادی سہولیات کی فراہمی اور دکانوں کے باہر گندگی پھینکنے والوں کے خلاف قانونی کارروائی کی ہدایت بھی جاری کی گئی۔
کمشنر پشاور ڈویژن نے متعلقہ افسران کو ہدایت کی کہ عوامی درخواستوں پر 24 گھنٹوں کے اندر ضروری احکامات جاری کیے جائیں اور عوام کو سرکاری دفاتر کے غیر ضروری چکروں سے نجات دلانے کے لیے زیرِ التوا امور کو ترجیحی بنیادوں پر نمٹایا جائے۔ انہوں نے واضح کیا کہ 100 روزہ مہم کے دوران صفائی، شہری سہولیات، ٹریفک مینجمنٹ، تجاوزات کے خاتمے، قیمتوں کی نگرانی اور سرکاری خدمات کی فراہمی سے متعلق اقدامات پر مؤثر عمل درآمد یقینی بنایا جائے۔ ڈپٹی کمشنرز روزانہ کی بنیاد پر پیش رفت کی نگرانی کریں گے، جبکہ کمشنر پشاور ڈویژن کی سطح پر ہفتہ وار جائزہ لیا جائے گا۔ تمام متعلقہ محکموں کو یومیہ رپورٹس اور اقدامات کے تصویری شواہد فراہم کرنے کی ہدایت بھی کی گئی۔
کمشنر پشاور ڈویژن کیپٹن (ر) خالد محمود نے اس عزم کا اظہار کیا کہ عوام کو بہتر شہری سہولیات، سرکاری دفاتر تک آسان رسائی اور مسائل کے بروقت حل کی فراہمی کے لیے تمام دستیاب وسائل بروئے کار لائے جائیں گے۔ انہوں نے ہدایت کی کہ عوامی خدمت کو عملی طور پر یقینی بنایا جائے اور فیصلوں پر عمل درآمد میں کسی قسم کی غیر ضروری تاخیر نہ کی جائے۔
