پیرس پاکستان کے ارشد ندیم نے پیرس اولمپکس 2024 میں مردوں کے جیولن تھرو مقابلے میں گولڈ میڈل جیت کر تاریخ رقم کی۔ انہوں نے اپنے دوسرے ہی کوشش میں 92.97 میٹر کی شاندار تھرو کے ساتھ نہ صرف مقابلہ جیتا بلکہ اولمپک ریکارڈ بھی توڑ دیا۔ارشد ندیم کی اس کامیابی نے نہ صرف پاکستانی قوم کا سر فخر سے بلند کیا بلکہ انہیں دنیا کے بہترین جیولن تھروز میں شامل کر دیا ہے۔ ان کی یہ تھرو اس سے قبل کے اولمپک ریکارڈ 90.57 میٹر کو بھی پیچھے چھوڑ گئی، جو ناروے کے اینڈریاس تھورکلڈسن نے قائم کیا تھا۔
ارشد ندیم نے اپنے پہلے تھرو میں غلط قدموں کی وجہ سے کوشش کو منسوخ کر دیا، لیکن دوسرے ہی تھرو میں انہوں نے جس مہارت اور عزم کا مظاہرہ کیا، وہ واقعی قابل ستائش ہے۔ ان کے اس کارنامے نے نہ صرف ان کے مخالفین بلکہ پوری دنیا کو حیران کر دیا۔ارشد ندیم نے اس سے قبل 2022 کے کامن ویلتھ گیمز میں گولڈ میڈل جیتا تھا، جبکہ 2023 کے ورلڈ چیمپئن شپ میں انہوں نے سلور میڈل حاصل کیا تھا۔ وہ 2018 کے ایشین گیمز میں برانز میڈل بھی جیت چکے ہیں۔ ارشد ندیم پچھلے اولمپکس میں پانچویں پوزیشن پر رہے تھے، جہاں ان کا بہترین تھرو 84.62 میٹر تھا۔
دوسری جانب، بھارت کے نیرج چوپڑا جو اس مقابلے کے فیورٹ سمجھے جا رہے تھے، فائنل میں صرف 89.45 میٹر کی تھرو کے ساتھ دوسرے نمبر پر رہے۔ارشد ندیم کی اس شاندار کارکردگی نے انہیں پاکستان کی تاریخ کا پہلا ٹریک اینڈ فیلڈ ایتھلیٹ بنا دیا ہے جو اولمپک پوڈیم پر کھڑا ہو گا۔ اس تاریخی لمحے نے پاکستان کے کھیلوں کی تاریخ میں ایک سنہری باب کا اضافہ کر دیا ہے۔
