باجوڑ فیسٹیول خیبرپختونخوا کلچراینڈٹورازم اتھارٹی، ضلعی انتظامیہ کے اشتراک سے منعقد ہوا۔ ضم اضلاع میں مزید صحت مند سرگرمیوں کا انعقاد کرینگے۔ دو روزہ فیسٹیول میں کھیلوں کے مقابلوں کیساتھ ساتھ محفل موسیقی، مشاعرہ، مزاحیہ شو اور دیگر سرگرمیاں شامل تھیں۔ اختتامی روز باجوڑ خار میں 7 کلومیٹر ٹریک پر سائیکل ریس کا انعقاد کیا گیا۔ میلے میں کبڈی، مارشل آرٹس، رسہ کشی کے مقابلے بھی مکمل ہوئے۔
اختتامی تقریب کے مہمان خصوصی پراجیکٹ ڈائریکٹرضم اضلاع ٹورازم اتھارٹی اشتیاق خان تھے۔ فیسٹیول میں محفل موسیقی میں مختلف گلوکاروں نے پرفارم کیا۔ مقامی شعراء انورزادہ، قادر خان، سلطان یوسف، گل یار، محمد خان اور محمد ایان نے اپنی شاعری بھی پیش کی۔
اختتامی تقریب میں مقامی طلبہ نے ٹیبلو پیش کیا۔ فیسٹیول میں صوفی اتنڑ، خٹک اتنڑاور وزیری اتنڑ پرفارمنس پیش کی گئیں۔ باجوڑ فیسٹیول میں چارلی چپلن اور میجک شو بچوں کی توجہ کا مرکز بنا رہا۔ سائیکل ریس میں لقمان نے پہلی، وحید نے دوسری اور امتیاز نے تیسری پوزیشن حاصل کی۔ فاتح سائیکلسٹ میں بالترتیب 40 ہزار، 25 ہزار اور 15 ہزار کے نقد انعام تقسیم کئے گئے۔ کبڈی، مارشل آرٹس، رسہ کشی کے فاتح کھلاڑیوں میں نقد انعامات اور ٹرافیاں تقسیم کی گئیں۔
