وزیراعلیٰ خیبر پختونخوا محمد سہیل آفریدی نے فرنٹئیر ویمن کالج پشاور میں انصاف فیمیل ایجوکیشن کارڈ کے اجرا کی تقریب سے خطاب کرتے ہوئے صوبے کی طالبات اور یتیم بچوں کے لیے مفت اعلیٰ تعلیم کے تاریخی منصوبے کا باقاعدہ افتتاح کر دیا۔ وزیراعلیٰ نے ایم ڈی کیٹ ٹیسٹ پاس کرنے والے یتیم طلبہ کے لیے مفت اعلیٰ تعلیم فراہم کرنے کا بھی اعلان کیا۔ ان کا کہنا تھا کہ انصاف فیمیل ایجوکیشن کارڈ کے تحت صوبے بھر کی 55 ہزار طالبات باری باری مفت اعلیٰ تعلیم سے مستفید ہوں گی۔

سہیل آفریدی نے بتایا کہ اس پروگرام کے تحت خیبر پختونخوا کے 120 کالجز کی طالبات کو سہولت فراہم کی جائے گی، جب کہ منصوبے کے لیے حکومت نے 4.5 ارب روپے مختص کیے ہیں۔ وزیر اعلیٰ نے کہا کہ خواتین کو اعلیٰ تعلیم کے ذریعے بااختیار بنانا حکومت کی اولین ترجیح ہے، کیونکہ تعلیم یافتہ خواتین ہی مضبوط، خوشحال اور باشعور معاشرے کی ضمانت ہیں۔ ان کے مطابق انصاف ایجوکیشن کارڈ حقیقی معنوں میں صنفی مساوات اور خواتین کی خود اعتمادی کی علامت ہے۔ انہوں نے کہا کہ پی ٹی آئی حکومت خواتین کو ترقی کے ہر میدان میں برابر مواقع فراہم کر رہی ہے اور آئندہ بجٹ میں خواتین کی تعلیم کے لیے مزید فنڈز مختص کیے جائیں گے۔ وزیر اعلیٰ نے مزید کہا کہ خیبر پختونخوا خواتین کی اعلیٰ تعلیم کے فروغ میں ماڈل صوبہ بنے گا۔ اس موقع پر انہوں نے بیچلر اور ماسٹر ڈگری ہولڈرز کے لیے انٹرن شپ پروگرام شروع کرنے کی بھی ہدایت کی۔