پشاور: ٹریفک ہیڈ کوارٹر میں “پلانٹ فار پاکستان” مہم کا آغاز

سٹی ٹریفک پولیس پشاور کے زیر اہتمام یوم آزادی کی مناسبت سے ٹریفک ہیڈ کوارٹرز گلبہار میں پرچم کشائی کی تقریب کا انعقاد کیا گیا جس میں چیف ٹریفک آفیسر سعود خان نے پرچم کشائی کی اور سلامی پیش کی۔ چیف ٹریفک آفیسر سعود خان نے پرچم کشائی کے بعد ملک و قوم کی سلامتی کیلئے دعائیں مانگیں اور ٹریفک ہیڈ کوارٹرز میں شجر کاری مہم کے تحت پودا بھی لگایا۔ چیف ٹریفک آفیسر سعود خان نے تقریب سے خطاب کرتے ہوئے کہا کہ پاکستان کی آزادی کیلئے ہمارے بڑوں نے لا زوال قربانیاں دی ہیں لا زوال قربانیوں کی وجہ سے آج ہم آزاد فضا میں سانس لے رہے ہیں پاکستان کی ترقی اور خوشحالی کیلئے ہم سب کو اپنا کردار ادا کرنا ہو گا۔ انہوں نے کہا کہ پاکستان حاصل کرنا اتنا آسان نہیں تھا شہیدوں کی قربانی سے یہ ملک حاصل ہوا ہے تمام شہداء کو قوم خراج عقیدت پیش کرتی ہے۔ انہوں نے ٹریفک حکام اور اہلکاروں کو ہدایت کی کہ وہ ادارے کے وقار کی بلندی کیلئے ایمانداری کو اپنا شعار بنائیں۔ انہوں نے کہا کہ آزادی ایک بڑی نعمت ہے اس لئے ہم سب کو مل کر ملک کی سلامتی اور استحکام کیلئے یکجہتی کا مظاہرہ کرنا ہو گا۔ انہوں نے کہا کہ آج کا دن ہمارے لئے بڑی خوش قسمتی کا دن ہے اسی دن پاکستان وجود میں آیا تھا ملک کی آزادی میں مشران اور قائدین نے لا زوال قربانیاں دی ہیں۔ انہوں نے ٹریفک حکام کو ہدایت کی کہ وہ یوم آزادی پر شہریوں کو سفری سہولیات فراہمی کرنے کے لئے متبادل راستوں بارے آگاہی دیں اس سلسلے میں یوٹیوب اور ایف ایم ریڈیو پر باقاعدہ شہریوں کو آگاہی بھی دی جائے گی۔ انہوں نے مزید کہا کہ ٹریفک حکام ون ویلنگ کرنیوالوں کے خلاف سخت سے سخت قانونی کارروائی عمل میں لائیں اور اسی طرح اوور سپیڈنگ میں ملوث افراد کی بھی حوصلہ شکنی کی جائے۔ انہوں نے ٹریفک حکام اور اہلکاروں کو ہدایت کی کہ وہ اپنے پوائنٹس میں موجود رہیں اور شہر میں کسی بھی جگہ رش نہ بننے دیں۔ انہوں نے کہا کہ شہری یوم آزادی منائیں مگر اپنی اور دوسروں کی زندگیوں کا خاص خیال رکھیں تاکہ کسی قسم کا ٹریفک حادثہ رونما نہ ہو۔ انہوں نے کہا کہ موٹر سائیکل سوار ہیلمٹ اور گاڑی چلانے والے حضرات سیٹ بیلٹ کا استعمال یقینی بنائیں۔ انہوں نے کہا کہ شہریوں کو سفری سہولیات فراہم کرنے کے لئے شہر بھر میں بھاری نفری تعینات کی گئی ہے اس سلسلے میں تمام اہلکاروں کی چھٹیاں منسوخ کر کے سپیشل ڈیوٹیاں لگائی گئی ہیں۔ انہوں نے ٹریفک حکام اور اہلکاروں کو ہدایت کی کہ وہ ایمانداری سے ڈیوٹی انجام دیں۔