مردان: خیبر میڈیکل یونیورسٹی کے زیرِ اہتمام 20 ستمبر 2026 کو منعقد ہونے والے MDCAT امتحان کے پیشِ نظر ضلعی انتظامیہ مردان نے سات امتحانی مراکز کے اطراف 200 میٹر کی حدود میں دفعہ 144 نافذ کر دی ہے۔
ڈپٹی کمشنر مردان کے دفتر سے جاری اطلاع کے مطابق پابندیوں کا نفاذ 19 اور 20 ستمبر کو ہوگا، جس کا مقصد امتحانی مراکز میں نظم و ضبط اور سیکیورٹی کو یقینی بنانا ہے۔
دفعہ 144 کے تحت امتحانی مراکز میں موبائل فون، اسمارٹ واچ، کیلکولیٹر اور دیگر الیکٹرانک آلات لانے پر پابندی ہوگی۔ اسی طرح کتب، نوٹس، گائیڈز اور حل شدہ پرچوں کی خرید و فروخت بھی ممنوع قرار دی گئی ہے۔
امتحانی مراکز کے 200 میٹر کے دائرے میں غیر متعلقہ افراد کے داخلے اور غیر ضروری اجتماع پر بھی پابندی عائد کی گئی ہے۔
مردان میں مقرر کیے گئے امتحانی مراکز میں الحمرا ویڈنگ ہال، جیل روڈ؛ تژون ہال، شوگر ملز بائی پاس روڈ؛ طور و ویڈنگ ہال، نوشہرہ روڈ؛ الخیر ویڈنگ ہال، شوگر ملز بائی پاس روڈ؛ رواج ویڈنگ ہال، انڈسٹریل اسٹیٹ کے قریب؛ اور ایگزیکٹو سروس کلب، شیخ ملتون ٹاؤن شامل ہیں، جبکہ تخت بھائی میں ارینا ویڈنگ ہال، بہلول پولیس چوکی کے قریب امتحانی مرکز مقرر کیا گیا ہے۔
ضلعی انتظامیہ نے امیدواروں اور شہریوں سے امتحانی مراکز کے اطراف عائد پابندیوں کی پابندی کرنے کی ہدایت کی ہے۔ نوٹیفکیشن 15 ستمبر 2026 کو جاری کیا گیا۔
