پشاور: گورنر خیبرپختونخوا فیصل کریم کنڈی نے کہا ہے کہ گورنر ہاؤس میں ’’وائس آف کے پی‘‘ کا آغاز صوبے کے نوجوانوں کے ٹیلنٹ اور ثقافت کو اجاگر کرنے کا بہترین موقع ہے۔ فنونِ لطیفہ معاشرے کے روشن اور مثبت چہرے کو اجاگر کرنے میں اہم کردار ادا کرتے ہیں، اس لیے ایسی سرگرمیوں کا فروغ ضروری ہے۔
ان خیالات کا اظہار انہوں نے ہوپ آرگنائزیشن کے زیر اہتمام صوبے کی موسیقی کے فروغ اور باصلاحیت افراد کو سامنے لانے کے لیے ’’وائس آف کے پی‘‘ کی لانچنگ تقریب سے خطاب کرتے ہوئے کیا۔ معروف پشتو گلوکار خیال محمد، سابق عالمی اسکواش چیمپئن جان شیر خان اور دیگر اہم شخصیات بھی تقریب میں موجود تھیں۔
گورنر فیصل کریم کنڈی نے کہا کہ خیبرپختونخوا نے ہمیشہ باصلاحیت افراد پیدا کیے ہیں اور پشتو سمیت صوبے کی دیگر زبانوں کے گلوکاروں کی صلاحیتوں کا دنیا معترف ہے۔ ’’وائس آف کے پی‘‘ محض ایک مقابلہ نہیں بلکہ نوجوانوں کی خوابیدہ صلاحیتوں کو سامنے لانے اور صوبے کی آواز بننے کا موقع ہے۔
انہوں نے کہا کہ خیبرپختونخوا ملک کو معدنیات، سستی بجلی، گیس اور دیگر قدرتی وسائل فراہم کر رہا ہے، جبکہ صوبے کے عوام نے ملکی سرحدوں کے دفاع اور دہشت گردی کے خلاف جنگ میں بھی نمایاں کردار ادا کیا ہے۔ ان کا کہنا تھا کہ دہشت گردی کے خلاف خیبرپختونخوا اور اس کے عوام صفِ اول میں کھڑے ہیں۔
فیصل کریم کنڈی نے کہا کہ پنجاب سمیت ملک کے دیگر حصوں میں مقیم پشتون بھی قومی معیشت میں اہم کردار ادا کر رہے ہیں، اس لیے تعصب کا خاتمہ انتہائی ضروری ہے۔ انہوں نے کہا کہ خیبرپختونخوا کے پانی، بجلی اور گیس سے فائدہ اٹھانے والوں کو یہ حقیقت تسلیم کرنی چاہیے کہ صوبہ ملکی معیشت اور ترقی میں اہم حصہ ڈال رہا ہے۔
گورنر نے ’’وائس آف کے پی‘‘ کو صوبے کا سافٹ امیج اجاگر کرنے کا اہم ذریعہ قرار دیتے ہوئے اس کے انعقاد پر منتظمین کو مبارکباد دی اور امید ظاہر کی کہ یہ سلسلہ مستقبل میں بھی جاری رہے گا۔ انہوں نے ہوپ کے سی ای او ذبیر الٰہی کی کاوشوں کو بھی سراہا۔
اس موقع پر ہوپ کے سی ای او ذبیر الٰہی نے اپنے خطاب میں تنظیم کی سماجی سرگرمیوں پر روشنی ڈالی اور ’’وائس آف کے پی‘‘ کی لانچنگ کے سلسلے میں گورنر خیبرپختونخوا فیصل کریم کنڈی کا شکریہ ادا کیا۔
