Daily Archives: October 2, 2024

 صوبے میں ڈینگی کے فعال کیسز 390 ہیں جن میں صرف 21 اسپتال میں داخل ہیں۔ صوبے میں اب تک ڈینگی کے 1002 کیسز رپورٹ ہوئے ہیں۔ اب تک ڈینگی میں مبتلا 612 مریض صحت یاب ہوچکے ہیں۔ پچھلے 24 گھنٹوں میں 98 ڈینگی کیسز رپورٹ ہوئے۔ اب تک پشاور سے 286 اور ایبٹ آباد سے 121 ڈینگی کیسز رپورٹ ہوئے ہیں۔ پشاور، ایبٹ آباد، نوشہرہ، مانسہرہ اور کوہاٹ میں اس وقت ڈینگی آوٹ بریک چل رہا ہے۔ ڈینگی سے اب تک دو اموات واقع ہوئی ہیں۔ صوبہ میں انسداد ڈینگی کی کاروائیاں جاری، عوام احتیاطی تدابیر پر عمل جا ری رکھنے کی ہدا یت۔

فوڈ سیفٹی ٹیموں نے ضلع پشاور،مردان ،خیبر اور ملاکنڈ میں خوراک سے وابستہ کاروباروں کے معائنے کیے. چارسدہ روڈ پشاور پر حفظانِ صحت کے اصولوں کی خلاف ورزی پر ایک پاپس یونٹ سیل، مزید قانونی کارروائی کا آغاز. فوڈ سیفٹی ٹیم مردان کا بھی خواجہ گنج، تخت بھائی، اور جھنڈے بازار میں چھاپےمارے گئے۔ دو گوداموں سے 500 کلو غیر معیاری کیچپ اور 40 کلو چائنہ سالٹ برآمد کرکے ضبط۔، فوڈ سیفٹی ایکٹ کے مطابق کاروائی۔ پشاورضلعی انتظامیہ کے ہمراہ تخت بھائی میں موبائل فوڈ ٹیسٹنگ لیب سے دودھ کے نمونوں کی ٹیسٹنگ، پانی کی ملاوٹ پر دوکانداروں پر جرمانے عائد انسپکشن ٹیم کا ملاکنڈ سخاکوٹ میں ناکہ بندی ، خوراکی اشیاء لے جانے والی گاڑیوں کی چیکنگ۔ چیکنگ کے دوران 200 لیٹرز دودھ غیر معیاری ثابت ہونے پر تلف، جرمانہ عائد۔ ضلع خیبر فوڈ سیفٹی ٹیم کا بھی لنڈی کوتل بازار میں موبائل ٹیسٹنگ لیب سے چائے کی پتی ، دودھ، ،مصالحہ جات ،گھی، نمک ،اور کولڈ ڈرنکس کے نمونوں کا جائزہ۔ ہوٹلوں اور ریسٹورنٹ کی چیکنگ کے دوران 40 لیٹرز غیر معیاری کوکنگ آئل برآمد ہونے پر تلف۔ خوردونوش اشیاء میں ملاوٹ کسی صورت برداشت نہیں۔  شہریوں کی صحت سے کھلواڑ کھیلنے والوں کیخلاف سخت تادیبی کاروائی کی جائے۔ ملاوٹ مافیا اپنا قبلہ درست کریں یا کاروائی کے لئے تیار ہو جائے۔

 خیبر پختونخوا پولیس میں بھرتی کے لئے منعقد ہونے والے تحریری امتحان میں سینکڑوں جعلی امیدوارن گرفتار کر لئے گئے۔تفصیلات کے مطابق پولیس بھرتی کے لئےایٹا کے زیر اہتمام منعقد ہونے والے امتحان میں 46000 امیدواران نے کاغذات جمع کیے ۔ پہلے مرحلے میں امیدواران کا فزیکل امتحان لیا گیا جس میں 13448 امیدواران کامیاب ٹھہرے ۔جسمانی امتحان میں کامیاب ہونے والے امیدواران کا تحریری امتحان صوبہ بھر کے گیارہ امتحانی مراکز میں منعقد ہوا ۔ حیران کن طور پر 147 امیدواران نے تحریری امتحان میں جعلسازی کے ذریعے اپنی جگہ کسی دوسرے فرد کو امتحان دلوانے کی کوشش کی ، تاہم جدید ترین سافٹ وئیر نے جعلی سازی کی تمام کوششیں ناکام بنا دیں۔ ایٹا ذرائع کے مطابق ایٹا امتحان میں بیٹھنے کے لئے ہر امیدوار کی نہ صرف نادرا سے تصدیق لازمی ہے بلکہ بھرتی کے ہر مرحلے پر اسے ایک جدید ترین سافٹ وئیر کی مدد سے جانچا بھی جا تا ہے۔ ذرائع نے بتا یا کہ کئی امیدواران نے فزیکل ٹسٹ کے مرحلے پر بھی جعل سازی کرنے کی کوشش کی تھی تاہم وہ کامیاب نہ ہو سکے تھے ۔کئی امیدواران نے کاغذات میں ہیر پھیر کر کے تحریری امتحان میں اپنی جگہ کسی دوسرے فرد کو بٹھانے کی کوشش کی مگر جونہی امیدوارن کی جانچ سافٹ وئیر سے شروع کی گئی تو جعلی امیدوارن کی فوری طور پر شناخت ہو گئی کیونکہ سافٹ وئیر ایسے امیدواران کی تصدیق نہیں کر رہا تھا۔ ایسے تمام جعلی امیدوارن کو موقع پر گرفتار کر کے پولیس کے حوالے کر دیا گیا جن کے خلاف متعلقہ تھانوں میں دفعہ 468، 471، 419 اور 420 کے تحت مقدمات درج کر دئیے گئے ہیں ۔ ایٹا ذرائع کے مطابق سب سے زیادہ جعلی سازی کے مرتکب افراد بنوں میں گرفتار کئے گئے جن کی تعداد 59 ہے۔ بٹگرام میں 31 ، کوہاٹ میں23، مردان میں 9، سوات اور ایبٹ آباد میں 6,6، ڈیرہ اسماعیل خان میں3 ،جبکہ ملاکنڈ ، مانسہرہ اور پشاور میں 1, 1 امیدوار جعل سازی کرتے ہوئے گرفتار ہوا۔ ہری پور اور چترال میں جعل سازی کا کوئی بھی کیس سامنے نہیں آیا۔
رپورٹ کے مطابق تحریری امتحان میں کامیاب ہونے والے امیدواران کا کوالٹی چیک کا مرحلہ صوبہ کے تمام ڈویژنل ہیڈکوارٹرز میں منعقد ہو گا جس میں نہ صرف کامیاب امیدواران کے اصل کاغذات کو چیک کیا جائے گا بلکہ ان کی شناخت کو ایک مرتبہ پھر مذکورہ سافٹ وئیر کے ذریعے جانچا جائے گا ۔ فائنل میرٹ لسٹ بناتے وقت ہر امیدوار کی ویڈیو شناخت کی جائے گی تاکہ یہ کنفرم کیا جا سکے کہ فزیکل اور تحریری امتحانات اور کوالٹی چیک کے مرحلہ پر ایک ہی امیدوار امتحان میں حاضر ہو ا ہے۔ یہی شناختی مواد انٹرویو کے مرحلہ کے لئے پولیس ڈپارٹمنٹ کے حوالے کیا جائے گا تاکہ اس موقع پر بھی یہ کنفرم کیا جاسکے کہ انٹرویو میں آنے والا امیدوار ہی بھرتی کے تمام مراحل سے گزرا ہے۔ ذرائع کا کہنا تھا کہ ان تمام اقدامات کے ذریعے سے یہ ناممکن بنا دیا گیا ہے کہ کوئی غلط امیدوار کسی بھی طرح سے بھرتی کے مراحل سے گزر سکے۔ ایٹا کی طرف سے فائنل میرٹ لسٹیں ایٹا کی ویب سائٹ اور پولیس ڈپارٹمنٹ کی ویب سائٹ پر اپ لوڈ کی جائیں گی تاکہ ہر امیدوار یہ جان سکے کہ میرٹ لسٹ میں شامل ہونے والا امیدوار کون سا ہے۔

خیبر پختونخوا اربن موبلیٹی اتھارٹی کے جاری کردہ نوٹیفیکیشن کے مطابق مکسڈ ٹریفک روڈ پر چلنے والے ایکسپریس سروس کا کرایہ فلیٹ 55 روپے مقرر۔ کرایے میں اضافہ طویل فاصلے کے مسافروں کو بہتر سفری سہولت فراہم کرنے کے لیے کیا گیا ہے۔ آغاز سے ہی ایکسپریس سروس کا مقصد طویل فاصلے کے مسافروں کو آرام دہ سفر فراہم کرنا رہا ہے۔ موجودہ صورتحال میں 2-3 اسٹاپس کا فاصلہ طے کرنے والے مسافر بھی ایکسپریس روٹس استعمال کر رہے ہیں۔ مختصر سفر کرنے والے مسافروں کے ایکپریس روٹس استعمال کرنے کی وجہ سے لمبے سفر والے مسافروں کو بس میں جگہ نہیں ملتی۔ اس رجحان کی حوصلہ شکنی کرنے کیلئے ایکسپریس روٹس کا کرایہ بڑھایا گیا ہے۔ اس اقدام سے طویل فاصلے تک سفر کرنے والے مسافروں پر کرایے کا اثر معمولی ہو گا، جبکہ کم فاصلے والے مسافر زیادہ موزوں روٹس کا استعمال کریں گے۔ جن روٹس کا کرایہ بڑھایا گیا ہے ان میں ER-09, ER-10, ER-12 اور ER-16 شامل ہے۔

 انسپکٹر جنرل آف پولیس خیبرپختونخوا اختر حیات خان، ریجنل پولیس آفیسر ملاکنڈ عرفان اللہ خان کے احکامات کی روشنی اور ڈسٹرکٹ پولیس آفیسر دیر بالا ظفر احمد خان کی خصوصی ہدایت پر پولیس لائن دیر بالا میں مجمع خلاف قانون کو منتشر کرنے کیلئے موک ایکسرسائز کا انعقاد کیا گیا۔ ڈی ایس پی ہیڈکوارٹر رفیع اللہ خان نے پولیس اہلکاروں کو موجودہ سیکورٹی صورتحال کے حوالے سے ضروری ہدایات جاری کیے۔ مشقوں کے دوران پولیس اہلکاروں نے جدید تربیتی تکنیکوں کا استعمال کرتے ہوئے انٹی رائیٹس سوٹ، شیلنگ گیس، آنسو گیس کے استعمال اور مجمع خلاف قانون کو منتشر کرنےکے حوالے سے فرضی ریہرسل کیا گیا۔ جن کا مقصد مظاہرین کو پرامن طریقے سے منتشر کرنا اور کسی بھی ناخوشگوار واقعے سے مؤثر انداز میں نمٹنا تھا۔

جنوبی وزیرستان میں پاک فوج اور فرنٹیئر کور ساؤتھ کے تعاون سے وزیرستان سپورٹس فیسٹیول کا انعقاد

امن کی روشنیوں میں ، جنوبی وزیرستان کے کھیلوں کے میدان سجنے جا رہے ایک بار پھر۔ جنوبی وزیرستان میں پاک فوج اور فرنٹیئر کور خیبر پختونخوا ساؤتھ کے تعاون سے قبائلی نوجوانوں کیلئے 1 اکتوبر سے 26 اکتوبر تک کھیلوں کے بڑے میلے کا انعقاد کیا جا رہا ہے۔ سپورٹس فیسٹیول میں جنوبی وزیرستان سے 136 کرکٹ ، 97 والی بال اور 146 فٹ بال کی ٹیمیں حصہ لے گی۔ کھیلوں کے مقابلے جنوبی وزیرستان کے 10 مقامات پر منعقد ہونگے۔ مقابلوں کو مقصد نوجوانوں کو تعلیمی سرگرمیوں کے ساتھ ساتھ کھیلوں کی طرف رجحان دلانا ہے تاکہ نوجوانوں میں نیا جوش ولولہ پیدا ہو۔

خیبر میڈیکل یونیورسٹی (کے ایم یو ) پشاور میں پروفیسر ڈاکٹر ارشد جاوید ایکیڈیمک بلاک کا افتتاح کردیا گیا۔ یہ افتتاح کے ایم یو کے سابق وائس چانسلر پروفیسر ڈاکٹر ارشد جاوید نے اپنی بیٹی ڈاکٹر زینب جاوید کے ہمراہ کیا جو اس موقع پر مہمان خصوصی تھے جبکہ اس موقع پر وائس چانسلر کے ایم یو پروفیسر ڈاکٹر ضیاءالحق اور رجسٹرار انعام اللہ وزیر کے علاوہ مختلف اداروں اور شعبوں کے سربراہان بھی موجود تھے۔ بعد ازاں افتتاحی تقریب سے سابق وائس چانسلر پروفیسر ڈاکٹرارشد جاوید نے خطاب کرتے ہوئےوائس چانسلر پروفیسر ڈاکٹر ضیاءالحق اور انکی ٹیم کا شکریہ ادا کرتے ہوئے کہا کہ کے ایم یو نے پروفیسر ڈاکٹر ضیاءالحق کے سربراہی میں تھوڑے عرصے میں جو ترقی کی کے وہ قابل تحسین ہے۔ انھوں نے کہا کہ کے ایم یو صحت کی تعلیم کا ایک بہترین ماڈل ہےجہاں صحت کے تمام شعبوں اور تمام سطحات کی تعلیم ایک چھت تلے دی جا رہی ہے جسکے نتیجے میں ہیلتھ ڈیلیوری کا ایک ایسا نظام پرورش پائے گا جس سے معاشرے کی عام شہری مستفید ہوسکیں گے۔ انھوں نے کہا کہ کے ایم یو نے علم و تحقیق کے ساتھ ساتھ صحت عامہ کی بہتری کے لئے جو اقدامات اٹھائے ہیں وہ دیگر اداروں کے لئے قابل تقلید ہیں۔ انھوں نے یونیورسٹی کے نرسنگ اور فزیوتھراپی بلاک کو انکے نام سے منسوب کرنے پریونیورسٹی کے موجودہ وائس چانسلر اور انکی ٹیم کا شکریہ ادا کیا اور اپنی جانب سے یونیورسٹی کے لئے نیک خواہشات کا اظہار کیا۔

پروفیسر ڈاکٹر ضیاءالحق نے تقریب سے خطاب کرتے ہوئے کہا کہ ہمارے ہاں عموما ًفوت شدہ شخصیات کی خدمات کے اعتراف میں یادگار یں تعمیر کی جاتی ہیں یا مختلف مقامات اور عمارتوں کو وفات شدہ شخصیات کے ناموں سےموسوم کیا جا تا ہے جبکہ ہم نے اس روایت کو تبدیل کرتے ہوئے اپنے زندہ لیجنڈز کو یاد رکھنے اور انہیں خراج عقیدت پیش کرنے کا فیصلہ کیا ہے اور اس سلسلے میں ہم نے یونیورسٹی کا ایک بلاک یونیورسٹی کے سابق وائس چانسلر پروفیسر ڈاکٹر ارشد جاوید کے نام سے منسوب کیا ہے۔ انھوں نے کہا کہ اس سے قبل ہم ایک بلاک یونیورسٹی کے بانی وائس چانسلر پروفیسر ڈاکٹر دائود خان اور ایک ہال دوسرے وائس چانسلر پروفیسر ڈاکٹر حفیظ اللہ کے نام سے منسوب کرچکے ہیں۔ انھوں نے کہا کہ پروفیسر ڈاکٹر ارشد جاوید نے یونیورسٹی کی ترویج و ترقی اور بالخصوص کورونا سے نمٹنے میں جو کردار ادا کیا وہ آئندہ نسلوں کے لئے ایک روشن مثال ہے۔ انھوں نے کہا کہ کے ایم یو نے جس سفر کا آغاز پروفیسر ڈاکٹر دائود خان اور پروفیسر ڈاکٹر حفیظ اللہ کی قیادت میں کیا تھا پروفیسر ڈاکٹر ارشد جاوید نے اس سفرکو نہ صرف کامیابی سے جاری رکھا بلکہ نئی اختراعات کے ذریعے یونیورسٹی کو علم و تحقیق کا ایک مثالی گہوارہ بنانے کی بھی کوشش کی۔ انھوں نے کہا کہ نرسنگ اور فزیو تھراپی بلاک کو پروفیسر ڈاکٹر ارشد جاوید کے نام سے منسوب کرنے کا مقصد جہاں انکی شبانہ روز محنت اور قائدانہ صلاحیتوں کا اعتراف ہے وہاں اس فیصلے کے ذریعے ہم اپنی آئندہ نسلوں کو یہ مثبت پیغام بھی دینا چاہتے ہیں کہ زندہ قومیں اپنے محسنوں کو ہمیشہ یاد رکھتی ہیں۔

مردان: ایس پی ہیڈ کوارٹر مردان رضوان حبیب کی زیر نگرانی آج پولیس اہلکاروں کیلئے کونسلنگ سیشن منعقد ہوا۔ اس سیشن میں ایلیٹ فورس، ریپڈ ریسپانس فورس، ڈی اے آر اور دیگر پولیس افسران اور اہلکاروں نے شرکت کی۔ پولیس اہلکاروں کو اس کونسلنگ سیشن میں ڈسپلن کی اہمیت، غیر قانونی سرگرمیوں سے گریز، اور سوشل میڈیا کے مناسب استعمال کے بارے میں تفصیلی بریفنگ دی گئی۔ سیشن کے دوران اہلکاروں کو یہ بھی باور کرایا گیا کہ وہ غیر جانبدار رہتے ہوئے عوام کی خدمت کریں اور کسی بھی سیاسی یا انتہا پسند عناصر سے دور رہیں۔

یہ کونسلنگ سیشن انسپکٹر جنرل خیبر پختونخواہ پولیس کے احکامات کی روشنی میں منعقد کیا جا رہا ہے، جس کا مقصد پولیس اہلکاروں کو ان کے فرائض کی یاد دہانی کروانا اور ان کی رہنمائی کرنا ہے۔ اس سیشن میں اہلکاروں کو اپنے مسائل پر بات کرنے کا موقع بھی فراہم کیا گیا۔ ایس پی ہیڈ کوارٹرز رضوان حبیب نے مزید کہا کہ اس طرح کے کونسلنگ سیشنز ہر ہفتے منعقد کیے جائیں گے تاکہ پولیس اہلکاروں کی کارکردگی اور ڈسپلن میں مزید بہتری لائی جا سکے.