پشاور: پی ڈی ایم اے خیبر پختونخوا نے صوبے کے بیشتر اضلاع میں آج سے 5 جون کے دوران وقفے وقفے سے تیز ہواؤں اور گرج چمک کے ساتھ بارشوں کی پیشگوئی کرتے ہوئے تمام ضلعی انتظامیہ کو الرٹ جاری کر دیا ہے۔
محکمہ موسمیات اور پی ڈی ایم اے کے مطابق اس دوران چترال، دیر، سوات، شانگلہ، کوہستان، بونیر، مالاکنڈ، بٹگرام، مانسہرہ اور ایبٹ آباد میں بارش اور ژالہ باری کا امکان ہے۔
اسی طرح پشاور، مردان، نوشہرہ، چارسدہ، صوابی، کوہاٹ، کرم، اورکزئی، خیبر، باجوڑ، مہمند، بنوں، لکی مروت، ڈیرہ اسماعیل خان اور ٹانک میں بھی آندھی اور بارشوں کی پیشگوئی کی گئی ہے۔
پی ڈی ایم اے کے مطابق بالائی اضلاع میں لینڈ سلائیڈنگ جبکہ مختلف علاقوں میں ندی نالوں میں طغیانی اور فلیش فلڈنگ کا خطرہ موجود ہے۔ میدانی علاقوں خصوصاً پشاور، مردان اور نوشہرہ میں اربن فلڈنگ کا خدشہ ظاہر کیا گیا ہے۔
محکمے نے خبردار کیا ہے کہ تیز ہواؤں اور ژالہ باری کے باعث کمزور عمارتوں، بجلی کے کھمبوں اور سولر پینلز کو نقصان پہنچ سکتا ہے، جبکہ کھڑی فصلیں بھی متاثر ہونے کا اندیشہ ہے۔
کسانوں کو احتیاطی تدابیر اختیار کرنے اور ضلعی انتظامیہ کو پیشگی اقدامات یقینی بنانے کی ہدایت کی گئی ہے۔ متعلقہ اداروں کو ریسکیو ٹیموں کی تیاری، شاہراہوں کی بحالی، متبادل راستوں کی فراہمی اور نکاسی آب کے نظام کی صفائی کے لیے بھی ہدایات جاری کی گئی ہیں۔
پی ڈی ایم اے نے سیاحوں کو غیر ضروری سفر سے گریز کرنے اور شہریوں کو ندی نالوں اور خطرناک مقامات سے دور رہنے کی ہدایت کی ہے۔
ترجمان کے مطابق پی ڈی ایم اے کا ایمرجنسی آپریشن سنٹر مکمل طور پر فعال ہے، اور شہری کسی بھی ناخوشگوار واقعے کی اطلاع ہیلپ لائن 1700 پر دے سکتے ہیں۔
