پشاور: پی ڈی ایم اے خیبرپختونخوا نے گلیشیائی جھیلوں کے پھٹنے (گلوف) اور اچانک سیلابی صورتحال کے خدشے کے پیش نظر صوبے کے بالائی اضلاع میں الرٹ جاری کر دیا ہے۔
پی ڈی ایم اے کے مطابق اپر چترال، لوئر چترال، اپر دیر، لوئر دیر، سوات، اپر کوہستان، لوئر کوہستان اور مانسہرہ کے ڈپٹی کمشنرز کو ممکنہ خطرات کے حوالے سے پیشگی اقدامات کی ہدایت جاری کی گئی ہے۔
ترجمان پی ڈی ایم اے کے مطابق صوبے میں جاری شدید گرمی کی لہر آئندہ چند روز تک برقرار رہنے کا امکان ہے، جبکہ 4 جون کی شام اور رات سے بالائی علاقوں میں گرج چمک کے ساتھ بارشوں کی پیش گوئی کی گئی ہے۔ شدید گرمی کے باعث شمالی اضلاع میں گلیشیئرز اور برف تیزی سے پگھل رہی ہے، جس سے بارشوں کے دوران پانی کے بہاؤ میں اضافے اور گلوف و فلیش فلڈز کے خطرات بڑھ گئے ہیں۔
پی ڈی ایم اے نے خبردار کیا ہے کہ سوات، چترال، کوہستان، دیر اور مانسہرہ کی برفانی وادیوں میں گلیشیائی جھیلوں کے پھٹنے، لینڈ سلائیڈنگ، مٹی اور پتھروں کے تودے گرنے اور رابطہ سڑکوں کی بندش کا خدشہ موجود ہے۔ ندی نالوں اور دریاؤں میں اچانک طغیانی سے نشیبی علاقوں میں سیلابی صورتحال بھی پیدا ہو سکتی ہے۔
ادارے نے ضلعی انتظامیہ کو حساس مقامات کی مسلسل نگرانی، بروقت وارننگ جاری کرنے، انخلائی مشقیں منعقد کرنے اور محفوظ مقامات پر ضروری سامان کی دستیابی یقینی بنانے کی ہدایت کی ہے۔ ساتھ ہی مقامی آبادی کو پیشگی آگاہ کرنے، کمیونٹی الرٹ سسٹمز فعال رکھنے اور ڈیزاسٹر مینجمنٹ کمیٹیوں سے قریبی رابطہ برقرار رکھنے پر بھی زور دیا گیا ہے۔
پی ڈی ایم اے نے عوام، خصوصاً سیاحوں اور مسافروں کو ہدایت کی ہے کہ گرمی کی لہر اور متوقع بارشوں کے دوران دریا کناروں، برساتی نالوں اور تیز بہاؤ والے مقامات کے قریب جانے سے گریز کریں اور غیر ضروری سفر سے اجتناب برتیں۔
ترجمان کے مطابق ریسکیو 1122، سی اینڈ ڈبلیو، این ایچ اے اور دیگر متعلقہ اداروں کو بھی ہنگامی صورتحال سے نمٹنے کے لیے الرٹ رہنے اور ضروری مشینری و عملہ پیشگی تعینات رکھنے کی ہدایت جاری کی گئی ہے۔ پی ڈی ایم اے کا ایمرجنسی آپریشن سنٹر مکمل طور پر فعال ہے، جبکہ عوام کو کسی بھی ناخوشگوار واقعے کی اطلاع ہیلپ لائن 1700 پر دینے کی ہدایت کی گئی ہے۔