پشاور: خیبر پختونخوا کے دارالحکومت پشاور میں نیشنل جونیئر چیمپئن شپ 2026 کے انعقاد کی تیاریاں حتمی مراحل میں داخل ہو گئی ہیں۔ چیمپئن شپ کا باضابطہ افتتاح 7 جون کو قیوم اسپورٹس کمپلیکس میں منعقد ہونے والی ایک پروقار تقریب میں کیا جائے گا۔
یہ بات مشیر کھیل و امور نوجوانان خیبر پختونخوا تاج محمد خان ترند نے میڈیا سے گفتگو کرتے ہوئے بتائی۔ اس موقع پر ڈائریکٹر جنرل سپورٹس تاشفین حیدر اور ڈائریکٹر آپریشنز جمشید بلوچ بھی موجود تھے۔
انہوں نے بتایا کہ چیمپئن شپ کا افتتاح وزیر اعلیٰ خیبر پختونخوا سہیل آفریدی کریں گے، جبکہ ملک کے چاروں صوبوں اور مختلف سرکاری محکموں سے تعلق رکھنے والے 952 مرد و خواتین کھلاڑی ایونٹ میں حصہ لیں گے۔
ڈائریکٹوریٹ جنرل آف سپورٹس خیبر پختونخوا کے زیر اہتمام ہونے والی چیمپئن شپ میں سکواش، ٹیبل ٹینس، ایتھلیٹکس، بیڈمنٹن، کراٹے اور والی بال کے مقابلے منعقد کیے جائیں گے۔ تمام کھیلوں میں مرد اور خواتین کے الگ الگ مقابلے ہوں گے، البتہ والی بال میں صرف مردوں کے مقابلے شامل ہیں۔
تاج محمد خان ترند نے نوجوان کھلاڑیوں پر زور دیا کہ وہ اس قومی ایونٹ کو اپنی صلاحیتوں کے اظہار کا بہترین موقع سمجھیں اور بھرپور محنت کے ذریعے اپنے صوبے اور ملک کا نام روشن کریں۔ انہوں نے کہا کہ صوبائی حکومت نوجوانوں کو کھیلوں کے مساوی اور معیاری مواقع فراہم کرنے کے لیے تمام دستیاب وسائل بروئے کار لا رہی ہے۔
انہوں نے کہا کہ یہ چیمپئن شپ نہ صرف کھیلوں کے فروغ کا ذریعہ بنے گی بلکہ ملک بھر کے نوجوانوں کو ایک پلیٹ فارم پر اکٹھا کر کے قومی یکجہتی اور باہمی روابط کو بھی مضبوط کرے گی۔
افتتاحی تقریب 7 جون کو منعقد ہوگی، جبکہ مختلف کھیلوں کے مقابلے 8 سے 10 جون تک جاری رہیں گے۔ سکواش کے مقابلے 3 سے 5 جون کے درمیان منعقد کیے جائیں گے۔
