پشاور: ملک میں پٹرولیم مصنوعات کی قیمتوں میں حالیہ اضافے کے خلاف خیبرپختونخوا کے وکلاء نے آج عدالتی بائیکاٹ کیا، جس کے باعث پشاور ہائیکورٹ سمیت صوبہ بھر کی عدالتوں میں وکلاء پیش نہیں ہوئے۔
خیبرپختونخوا بار کونسل کی جانب سے پٹرولیم مصنوعات کی قیمتوں میں اضافے کے خلاف احتجاجاً ہڑتال کا اعلان کیا گیا تھا، جس پر عمل کرتے ہوئے وکلاء نے عدالتوں میں پیشی سے گریز کیا۔
اس موقع پر وکلاء کا کہنا تھا کہ پٹرولیم مصنوعات کی قیمتوں میں اضافہ افسوسناک ہے اور اس فیصلے نے عوام کی زندگی کو مزید مشکل بنا دیا ہے۔ انہوں نے کہا کہ مہنگائی کے اس دور میں ایندھن کی قیمتوں میں اضافہ عوام پر اضافی بوجھ ڈالنے کے مترادف ہے۔
وکلاء نے حکومت سے مطالبہ کیا کہ پٹرولیم مصنوعات کی قیمتوں میں فوری کمی کی جائے تاکہ عوام کو ریلیف مل سکے۔
