پشاور: ریسکیو 1122 خیبرپختونخوا نے باچا خان انٹرنیشنل ائیرپورٹ سے بیرونِ ملک سے آنے والے جسدِ خاکی کی صوبے کے مختلف اضلاع تک مفت منتقلی سروس کا باقاعدہ آغاز کر دیا ہے۔
اس سروس کا افتتاح صوبائی وزیر برائے ریلیف عاقب اللہ خان نے کیا۔ اس موقع پر انہوں نے کہا کہ بیرونِ ملک مقیم پاکستانی ملک کا قیمتی سرمایہ ہیں اور مشکل وقت میں ان کے اہل خانہ کے ساتھ کھڑا ہونا حکومت کی ذمہ داری ہے۔
انہوں نے کہا کہ غمزدہ خاندانوں کو سہولت فراہم کرنا انسانیت کی خدمت ہے اور حکومت عوامی فلاح و بہبود کے لیے عملی اقدامات کر رہی ہے۔ ان کے مطابق مفت جسدِ خاکی منتقلی سروس سے متاثرہ خاندانوں پر مالی بوجھ کم ہوگا۔
صوبائی وزیر نے کہا کہ ریسکیو 1122 خیبرپختونخوا ایمرجنسی صورتحال میں فوری اور معیاری خدمات فراہم کرنے والا ایک مؤثر ادارہ بن چکا ہے، جبکہ بیرونِ ملک سے آنے والے جسدِ خاکی کو مکمل احترام اور وقار کے ساتھ مفت منتقل کیا جائے گا۔
انہوں نے بتایا کہ اس مقصد کے لیے چھ خصوصی ایمبولینسز چوبیس گھنٹے دستیاب رہیں گی، جبکہ باچا خان انٹرنیشنل ائیرپورٹ پر ریسکیو 1122 کا خصوصی ہیلپ ڈیسک اور کاؤنٹر بھی قائم کر دیا گیا ہے۔
عاقب اللہ خان نے مزید کہا کہ شہری جسدِ خاکی منتقلی سروس کے حصول کے لیے 1122، ریسکیو ہیلپ ڈیسک اور پراونشل مانیٹرنگ سیل سے رابطہ کر سکتے ہیں۔ انہوں نے اس اقدام کو بیرونِ ملک مقیم پاکستانیوں کے لیے اعتماد، احساسِ تحفظ اور فلاحی خدمات کے حکومتی عزم کا عملی مظہر قرار دیا۔
