وانا: فرنٹیئر کور خیبر پختونخوا (ساؤتھ) کے زیر اہتمام وزیرستان امن فیسٹیول 2026 کا انعقاد 12 جون سے 10 جولائی تک کیا جائے گا، جس کے دوران جنوبی وزیرستان کے 23 مختلف مقامات پر کھیلوں اور ثقافتی سرگرمیوں کا اہتمام کیا جائے گا۔
منتظمین کے مطابق فیسٹیول کا مقصد نوجوانوں کو مثبت سرگرمیوں کی جانب راغب کرنا، مقامی صلاحیتوں کو اجاگر کرنا اور علاقے میں امن، بھائی چارے اور سماجی ہم آہنگی کو فروغ دینا ہے۔
فیسٹیول کے دوران کرکٹ، فٹبال اور والی بال کے مقابلے منعقد کیے جائیں گے، جن میں وزیرستان کے مختلف علاقوں کی ٹیمیں حصہ لیں گی۔ ان مقابلوں کے ذریعے نوجوان کھلاڑیوں کو اپنی صلاحیتوں کے اظہار اور صحت مند مسابقتی ماحول میں شرکت کا موقع ملے گا۔
منتظمین کا کہنا ہے کہ وزیرستان کے نوجوان باصلاحیت اور بااختیار ہیں اور وہ ملک کے روشن مستقبل کے ضامن ہیں۔ فیسٹیول نوجوانوں کی توانائیوں کو مثبت سمت دینے اور ان میں ٹیم ورک، نظم و ضبط اور قومی یکجہتی کے جذبے کو فروغ دینے میں اہم کردار ادا کرے گا۔
کھیلوں کے ساتھ ساتھ ثقافتی پروگرام بھی فیسٹیول کا حصہ ہوں گے۔ روایتی اتنڑ پیش کیا جائے گا جو وزیرستان کی ثقافتی روایات اور مقامی شناخت کی عکاسی کرتا ہے، جبکہ رنگا رنگ آتش بازی فیسٹیول کی رونقوں میں مزید اضافہ کرے گی۔
منتظمین کے مطابق کھیل، ثقافت اور تفریح کا یہ حسین امتزاج نہ صرف عوامی توجہ کا مرکز بنے گا بلکہ علاقے میں امن و استحکام کے مثبت پیغام کو بھی اجاگر کرے گا۔
وزیرستان امن فیسٹیول 2026 کو مقامی سطح پر امن، ہم آہنگی اور نوجوانوں کی تعمیری سرگرمیوں کے فروغ کی جانب ایک اہم قدم قرار دیا جا رہا ہے۔
