کمشنر پشاور ڈویژن ریاض خان محسود کی زیر صدارت ڈینگی وائرس کی روک تھام کے حوالے سے ایک اہم اجلاس منعقد ہوا، جس میں پشاور، نوشہرہ، چارسدہ، ضلع خیبر اور ضلع مہمند کے ڈپٹی کمشنرز، ڈسٹرکٹ ہیلتھ آفیسرز، ماہرینِ حشرات الارض، بلدیاتی افسران، ہیلتھ اسٹاف اور متعلقہ اداروں کے نمائندوں نے شرکت کی۔اجلاس میں ڈینگی ایکشن پلان 2026 پر عملدرآمد، پانچوں اضلاع میں ڈینگی کی موجودہ صورتحال، بیماری کی نگرانی، انڈور و آؤٹ ڈور لاروا سرویلنس، اسپتالوں کی تیاری، ادویات و آلات کی دستیابی، اینٹی ڈینگی اسپرے، عوامی آگاہی مہم، بین الادارہ جاتی تعاون اور آئندہ کے لائحہ عمل پر تفصیلی بریفنگ دی گئی۔ اجلاس کو بتایا گیا کہ بروقت اور مؤثر اقدامات کے باعث رواں سال پشاور ڈویژن میں ڈینگی کیسز میں نمایاں کمی آئی ہے، جبکہ رپورٹ ہونے والے متعدد کیسز کا تعلق دیگر اضلاع یا صوبوں سے سفر کی ہسٹری رکھنے والے افراد سے ہے۔ مجموعی صورتحال اطمینان بخش ہے اور ڈینگی سے کوئی جانی نقصان رپورٹ نہیں ہوا۔
اجلاس سے خطاب کرتے ہوئے کمشنر پشاور ڈویژن ریاض خان محسود نے ڈینگی کیسز میں واضح کمی پر اطمینان کا اظہار کرتے ہوئے ہدایت کی کہ ڈینگی وائرس کی روک تھام کے لیے پیشگی اقدامات سال بھر تسلسل کے ساتھ جاری رکھے جائیں تاکہ خصوصاً ستمبر اور اکتوبر کے دوران بھی صورتحال مکمل طور پر قابو میں رہے۔ انہوں نے عوامی آگاہی مہم کو مزید مؤثر بنانے، سوشل، پرنٹ اور الیکٹرانک میڈیا سمیت تمام ذرائع بروئے کار لانے، لاروا کے خاتمے کی کارروائیوں میں تیزی لانے، مون سون بارشوں کے دوران بروقت نکاسی آب یقینی بنانے، متعلقہ اداروں کے درمیان باہمی رابطہ مزید مضبوط بنانے، ڈینگی کے پھیلاؤ کا سبب بننے والے عوامل کے خلاف دفعہ 144 کے تحت کارروائی، تمام ڈپٹی کمشنرز کی فیلڈ میں مؤثر نگرانی اور دستیاب وسائل کے بھرپور استعمال کی ہدایات جاری کرتے ہوئے تمام اقدامات کی ہفتہ وار رپورٹ طلب کر لی۔
