پشاورکرکٹ کے فروغ کے لئے شہید بے نظیر بھٹو وویمن یونیورسٹی پشاور اور پاکستان کرکٹ بورڈ کے درمیان 10 سالہ معاہدہ طے پا گیا جس پر وائس چانسلر پروفیسر ڈاکٹر صفیہ احمد اور ہیڈ آف وویمن کرکٹ پی سی بی تانیہ احمد نے دستخط کئے۔ بے نظیر یونیورسٹی کی ڈائریکٹر سپورٹس ماریہ ثمین اور پی سی بی کی اسسٹنٹ منیجر آپریشن خیبر پختوا حسینہ خوشبو نے بطور گواہ دستخط کئے۔ معاہدے کے تحت بے نظیر بھٹو وویمن یونیورسٹی میں مقامی افراد اور طلبہ کے لئے گراؤنڈ اور اکیڈمی قائم کئے جائیں گے۔ پی سی بی گراؤنڈ کی اپ لیفٹنگ، دیکھ بال، نیٹس اور پیچز بنانے، آلات ومشینری کی فراہمی کا ذمہ دار ہوگا۔ یونیورسٹی طالبات اور کھلاڑی ضرورت کی بنیاد پر نیٹ کی سہولیات استعمال کریں گی، گراؤنڈ کو خوبصورت بناکر کرکٹ کی سہولیات فراہم کی جائیں گی، نوجوانوں کو کرکٹ کی سرگرمیوں میں شامل کیا جائے گا۔ یونیورسٹی گراؤنڈ، عملے کے دفاتر، پویلین، چینجنگ روم، سٹور، کھلاڑیوں اور آفیشل کے ہاسٹل کے لئے جگہ فراہم کرنے کی ذمہ دار ہوگی، تعمیر پی سی بی کی ذمہ داری ہوگی، پشاور، چارسدہ اور نوشہرہ کے طلبہ کو مخصوص روٹ پر لانے جانے کے لئے یونیورسٹی ٹرانسپورٹ فراہم کرے گی۔
