پشاور: صوبائی ڈیزاسٹر مینجمنٹ اتھارٹی (پی ڈی ایم اے) خیبرپختونخوا نے 25 مارچ سے جاری بارشوں کے باعث ہونے والے جانی و مالی نقصانات کی تازہ رپورٹ جاری کر دی ہے، جس کے مطابق مختلف اضلاع میں پیش آنے والے حادثات کے نتیجے میں اب تک 30 افراد جاں بحق جبکہ 85 افراد زخمی ہو چکے ہیں۔
پی ڈی ایم اے کے مطابق جاں بحق افراد میں 20 بچے، 5 مرد اور 5 خواتین شامل ہیں، جبکہ زخمیوں میں 36 مرد، 11 خواتین اور 38 بچے شامل ہیں۔
رپورٹ کے مطابق مسلسل بارشوں کے باعث گھروں کی چھتیں اور دیواریں گرنے سے مجموعی طور پر 140 مکانات متاثر ہوئے، جن میں 115 گھروں کو جزوی جبکہ 25 مکانات مکمل طور پر منہدم ہو گئے۔
ادارے کے مطابق یہ حادثات صوبے کے مختلف اضلاع بنوں، ایبٹ آباد، کوہاٹ، پشاور، نوشہرہ، باجوڑ، لکی مروت، کرم، ہنگو، شانگلہ، بونیر، مالاکنڈ، دیر اپر، بٹگرام، شمالی وزیرستان اور ٹانک میں پیش آئے۔
پی ڈی ایم اے، ریسکیو 1122، ضلعی انتظامیہ اور دیگر متعلقہ ادارے متاثرہ علاقوں میں امدادی سرگرمیوں میں مصروف ہیں اور آپس میں مسلسل رابطے میں ہیں۔ پی ڈی ایم اے نے متعلقہ اضلاع کی انتظامیہ کو ہدایت کی ہے کہ متاثرین کو فوری طور پر امدادی سامان فراہم کیا جائے اور امدادی سرگرمیوں کو مزید تیز کیا جائے۔
پی ڈی ایم اے کے مطابق صوبے کے مختلف اضلاع میں بارشوں کا سلسلہ وقفے وقفے سے جاری ہے جبکہ یکم اپریل سے شروع ہونے والا نیا سلسلہ 4 اپریل تک جاری رہنے کا امکان ظاہر کیا گیا ہے۔
ڈی جی پی ڈی ایم اے نے عوام سے اپیل کی ہے کہ وہ بلا ضرورت سفر سے گریز کریں، حساس سیاحتی مقامات کا رخ نہ کریں اور حکومتی اداروں کی جانب سے جاری کردہ الرٹس اور ایڈوائزری پر عمل کریں۔
ترجمان پی ڈی ایم اے کے مطابق ادارے کا ایمرجنسی آپریشن سنٹر مکمل طور پر فعال ہے اور عوام کسی بھی ناخوشگوار واقعے کی اطلاع، موسمی صورتحال سے آگاہی اور معلومات کے لیے فری ہیلپ لائن 1700 پر رابطہ کر سکتے ہیں
