پشاور: فیڈرل انویسٹی گیشن ایجنسی (ایف آئی اے) خیبرپختونخوا نے حوالہ/ہنڈی کے خلاف اپنی تاریخ کی بڑی کارروائی کرتے ہوئے 25 کروڑ سے زائد رقم برآمد کر لی ہے۔
ایف آئی اے کے مطابق کمرشل بینکنگ سرکل (سی بی سی) پشاور نے ضلع ملاکنڈ کے قریب چکدرہ ٹول پلازہ پر خفیہ اطلاع کی بنیاد پر چھاپہ مار کارروائی کی۔ کارروائی 5 مئی 2026 کو اسسٹنٹ ڈائریکٹر محمد نصیر کی نگرانی میں انجام دی گئی۔
کارروائی کے دوران دو ملزمان، محمد عمران اور عثمان کو گرفتار کر لیا گیا جبکہ ان کے قبضے سے 25 کروڑ 3 لاکھ 94 ہزار روپے (250,394,000 روپے) نقد برآمد کیے گئے۔ ایف آئی اے کے مطابق ملزمان کے قبضے سے حوالہ/ہنڈی کاروبار سے متعلق اہم شواہد بھی حاصل کیے گئے ہیں۔
ابتدائی تحقیقات کے مطابق ملزمان اسٹیٹ بینک آف پاکستان کی اجازت کے بغیر غیر قانونی مالیاتی سرگرمیوں میں ملوث تھے۔ حکام نے بتایا کہ ملزمان کے خلاف مقدمہ درج کر کے مزید تفتیش شروع کر دی گئی ہے۔
ایف آئی اے حکام کا کہنا ہے کہ خیبرپختونخوا میں مالیاتی جرائم کے خلاف زیرو ٹالرنس پالیسی کے تحت بلا امتیاز کارروائیاں جاری رکھی جائیں گی۔