ایبٹ آباد: شہریوں کو سرکاری خدمات کی فراہمی میں آسانی اور بہتری کے لیے سرمد سلیم اکرم کی زیر نگرانی نیو تحصیل بلڈنگ میں انفارمیشن ڈیسک قائم کر دیا گیا، جس کا باقاعدہ افتتاح ڈپٹی کمشنر نے ایڈیشنل ڈپٹی کمشنر جنرل گوہر علی کے ہمراہ کیا۔
افتتاحی تقریب میں تحصیلدار، نائب تحصیلدار، ڈپٹی ڈائریکر سروس ڈیلیوری سینٹر اور ریونیو اسٹاف بھی موجود تھا۔ ضلعی انتظامیہ کے مطابق یہ اقدام صوبائی حکومت کے اس ایجنڈے کا حصہ ہے جس کے تحت شہریوں کو سرکاری خدمات کی فراہمی کو مزید مؤثر اور آسان بنایا جا رہا ہے۔
انتظامیہ کا کہنا ہے کہ انفارمیشن ڈیسک کے قیام سے شہریوں کو مختلف سرکاری خدمات سے متعلق فوری اور جامع معلومات میسر آئیں گی۔ ڈیسک پر سروس ڈیلیوری سینٹر، ڈومیسائل، آرمز لائسنس اور ڈرائیونگ لائسنس سے متعلق مکمل رہنمائی فراہم کی جائے گی۔
ڈپٹی کمشنر سرمد سلیم اکرم نے کہا کہ ضلعی انتظامیہ شہریوں کو بہتر سہولیات کی فراہمی کے لیے عملی اقدامات کر رہی ہے، جبکہ انفارمیشن ڈیسک کے قیام سے دفاتر میں خدمات کے معیار اور شفافیت میں مزید بہتری آئے گی۔
