پولیس ڈرائیونگ اینڈ ٹریننگ سکول اورکزئی میں چوتھے بیج کے کورس کی اختتامی تقریب منعقد ہوئی، جس میں ڈسٹرکٹ پولیس آفیسر اورکزئی شوکت علی اور ڈپٹی کمشنر اورکزئی یوسف خان نے بطور مہمانِ خصوصی شرکت کی۔ تقریب کے دوران کامیابی سے کورس مکمل کرنے والے شرکاء میں سرٹیفکیٹس تقسیم کیے گئے، جبکہ کے ڈرائیونگ سکول سٹاف میں بھی تعریفی سرٹیفکیٹس تقسیم کئے۔ اس موقع پر ایڈیشنل ڈپٹی کمشنر سلمان کنڈی اور پولیس ڈرائیونگ ٹریننگ سکول کا دیگر عملہ بھی موجود تھا۔ تقریب سے خطاب کرتے ہوئے ڈی پی او اورکزئی شوکت علی نے کہا کہ ٹریفک قوانین پر عملدرآمد ہر شہری کی مشترکہ ذمہ داری ہے۔ انہوں نے کہا کہ ٹریفک قوانین کی پابندی نہ صرف قانون کی بالادستی کو یقینی بناتی ہے بلکہ قیمتی انسانی جانوں کے تحفظ اور ٹریفک حادثات کی روک تھام میں بھی اہم کردار ادا کرتی ہے۔ انہوں نے مزید کہا کہ قوانین پر مؤثر عملدرآمد کے لیے عوام میں ٹریفک قوانین سے آگاہی اور شعور اجاگر کرنا ناگزیر ہے۔
اس موقع پر ڈپٹی کمشنر اورکزئی یوسف خان نے کہا کہ محفوظ سفر اور منظم ٹریفک نظام کے قیام کے لیے تربیت یافتہ اور ذمہ دار ڈرائیور وقت کی اہم ضرورت ہیں۔ انہوں نے کہا کہ پولیس ڈرائیونگ اینڈ ٹریننگ سکول کا یہ اقدام قابلِ تحسین ہے، جو شہریوں میں محفوظ ڈرائیونگ کے فروغ اور ٹریفک حادثات میں کمی لانے میں اہم کردار ادا کرے گا۔ انہوں نے کورس مکمل کرنے والے شرکاء کو مبارکباد دیتے ہوئے امید ظاہر کی کہ وہ عملی زندگی میں ٹریفک قوانین کی مکمل پابندی کریں گے اور دوسروں کے لیے بھی ایک مثبت مثال بنیں گے۔
