باجوڑ: انسپکٹر جنرل فرنٹیئر کور (نارتھ) راؤ عمران سرتاج نے ڈسٹرکٹ پولیس آفس باجوڑ کا دورہ کیا، جہاں انہوں نے پولیس افسران سے ملاقات کے دوران ضلع میں امن و امان کی صورتحال، سیکیورٹی انتظامات اور درپیش چیلنجز پر تبادلہ خیال کیا۔
اس موقع پر کمانڈنٹ باجوڑ اسکاؤٹس بریگیڈیئر وقاص گھمن، ڈسٹرکٹ پولیس آفیسر باجوڑ خان زیب مہمند، ڈپٹی کمشنر عدنان فرید اور ایس پی انویسٹی گیشن اجمل خان بھی موجود تھے۔
آئی جی ایف سی نارتھ نے پولیس جوانوں سے ملاقات کرتے ہوئے ان کے جذبے، حوصلے اور پیشہ ورانہ کارکردگی کو سراہا۔ انہوں نے جوانوں کو ہدایت کی کہ شرپسند عناصر کے مذموم عزائم ناکام بنانے، امن و امان برقرار رکھنے اور عوام کے جان و مال کے تحفظ کے لیے مستعدی، پیشہ ورانہ صلاحیت اور باہمی تعاون کے ساتھ فرائض انجام دیے جائیں۔
ملاقات کے دوران ضلعی انتظامیہ، پولیس اور سیکیورٹی اداروں کے درمیان مؤثر رابطے اور باہمی تعاون کو مزید مضبوط بنانے کے عزم کا بھی اظہار کیا گیا۔
