مردان: عوامی مسائل کے بروقت حل اور سروس ڈیلیوری کے تسلسل کو یقینی بنانے کے لیے ضلعی انتظامیہ مردان کے زیر اہتمام سروس ڈیلیوری سنٹر میں عوامی ریونیو دربار کا انعقاد کیا گیا۔
دربار کی صدارت اسسٹنٹ کمشنر تخت بھائی علینہ شکیل ناگرہ نے کی، جبکہ ایڈیشنل اسسٹنٹ کمشنرز سردار بہرام اور منیزہ خان، تحصیلدار رحمان الرشید، تحصیلدار ایس ڈی سی محمد شعیب، محکمہ مال کے گرداورز، ایس ڈی سی عملہ، علاقہ عمائدین، منتخب نمائندوں، کسانوں اور زمینداروں نے شرکت کی۔
اس موقع پر شرکاء نے بینک کاؤنٹر، جائیداد، حد بندی، میراث، انتقالات، فرد بدر، ناموں اور سرکاری ریکارڈ میں غلطیوں کی درستگی سمیت دیگر ریونیو امور سے متعلق مسائل اور شکایات پیش کیں۔
اسسٹنٹ کمشنر علینہ شکیل ناگرہ نے متعدد مسائل کے حل کے لیے موقع پر ہی احکامات جاری کیے، جبکہ دیگر معاملات متعلقہ محکموں کو فوری کارروائی، باہمی رابطے سے مسائل کے حل اور مقررہ مدت میں پیش رفت رپورٹ جمع کرانے کی ہدایت کی۔
انہوں نے کہا کہ عوامی مسائل کا بروقت حل ضلعی انتظامیہ کی اولین ترجیح ہے۔ کھلی کچہریوں اور ریونیو درباروں کا مقصد شہریوں کو سرکاری اداروں تک براہِ راست رسائی فراہم کرنا، ان کی شکایات سننا اور ان کے مسائل کے فوری اور مؤثر حل کو یقینی بنانا ہے۔
اسسٹنٹ کمشنر نے محکمہ مال کے اہلکاروں پر زور دیا کہ عوامی شکایات کے ازالے میں کسی قسم کی غفلت نہ برتی جائے۔ انہوں نے کہا کہ ایسے درباروں سے عوام اور سرکاری اداروں کے درمیان رابطے بہتر ہوتے ہیں، جبکہ بالمشافہ گفتگو کے ذریعے مسائل کے حل کے لیے قابلِ عمل تجاویز بھی سامنے آتی ہیں۔
