مردان — کمشنر مردان ڈویژن سید محمد علی شاہ نے متعلقہ حکام کو مردان سپورٹس کمپلیکس کی تزئین و آرائش، رنگ و روغن اور صفائی کا کام ایک ماہ میں مکمل کرنے کی ہدایت کی ہے۔ انہوں نے کہا کہ وہ 3 دسمبر کو دوبارہ دورہ کر کے کام کی پیش رفت اور دستیاب سہولیات کا جائزہ لیں گے۔
دورے کے دوران کمشنر کو کھیلوں کی سہولیات، جاری سرگرمیوں اور انتظامی امور پر بریفنگ دی گئی۔ انہوں نے فیملی جمنازیم، ہاکی اور کرکٹ گراؤنڈز، جوان مرکز، اسکواش کورٹ اور ملٹی پرپز جمنازیم کا معائنہ کیا۔
سید محمد علی شاہ نے کہا کہ کمپلیکس میں کھیلوں کی سہولیات کا معیار برقرار رکھنا اور کھلاڑیوں کو صاف ستھرا ماحول فراہم کرنا مشترکہ ذمہ داری ہے۔ انہوں نے متعلقہ حکام کو سہولیات کی دیکھ بھال اور بہتری پر توجہ دینے کی ہدایت کی۔
