پشاور: پی سی بی انٹر اسکول کرکٹ چیمپئن شپ 2026 کے سلسلے میں پمز کرکٹ کلب کے زیر اہتمام پمز اسکول میں کٹس تقسیم کرنے کی تقریب منعقد ہوئی، جس میں نوجوان کرکٹرز میں کھیلوں کا سامان تقسیم کیا گیا۔

تقریب کے مہمانِ خصوصی پمز ایجوکیشن سسٹم کے چیف ایگزیکٹو آفیسر (سی ای او) اسماعیل خان تھے، جبکہ فرسٹ کلاس کرکٹر حمد الحسن، پشاور ریجن کرکٹ کے سیکرٹری سید حنیف شاہ اور پمز ایجوکیشن سسٹم کے منیجنگ ڈائریکٹر انور خان سمیت دیگر اہم شخصیات نے شرکت کی۔

اس موقع پر منتظمین نے کہا کہ نوجوان کھلاڑیوں کو بہتر سہولیات اور سازگار کھیلوں کا ماحول فراہم کرنا وقت کی اہم ضرورت ہے۔ کٹس کی تقسیم کا مقصد اسکول کی سطح پر کرکٹ کو فروغ دینا اور باصلاحیت نوجوان کھلاڑیوں کی حوصلہ افزائی کرنا ہے۔

تقریب کے دوران مہمانوں نے نوجوان کرکٹرز میں کٹس تقسیم کیں اور انہیں چیمپئن شپ میں بھرپور محنت، نظم و ضبط اور کھیل کے جذبے کے ساتھ شرکت کرنے کی تلقین کی۔