وزیراعلیٰ کی زیر صدارت سالانہ ترقیاتی پروگرام (ADP) 2026-27 سے متعلق اہم اجلاس منعقد ہوا، جس میں اطلاعات و تعلقات عامہ، سائنس و ٹیکنالوجی، انفارمیشن ٹیکنالوجی، قانون، مائنز و منرلز اور لیبر ڈیپارٹمنٹس کے نئے منصوبوں پر تفصیلی غور کیا گیا۔ اجلاس میں وزیراعلیٰ نے صحافیوں کی فلاح و خودمختاری کے لیے میڈیا پروڈکشن اور براڈکاسٹنگ سیٹ اپس کے قیام کی غرض سے بلا سود قرضوں کی فراہمی کی اسکیم تجویز کرنے کی ہدایت کی۔ ان کا کہنا تھا کہ اس اقدام سے نوجوان صحافیوں کو خود روزگاری کے مواقع میسر آئیں گے اور وہ اپنے پلیٹ فارمز قائم کر سکیں گے، جس سے صحافت مزید خودمختار اور بااختیار ہوگی۔
وزیر اعلیٰ نے صحافیوں کے لیے میڈیا کالونیوں کے قیام اور ضم اضلاع میں پریس کلبوں کی بہتری کے لیے بھی منصوبے تیار کرنے کی ہدایت جاری کی۔ اس کے علاوہ تمام جوڈیشل کمپلیکسز میں ڈے کیئر سینٹرز کے قیام، پشاور میں جوڈیشل اکیڈمی کے قیام اور باجوڑ اور مانسہرہ میں ڈسٹرکٹ جوڈیشل کمپلیکسز کے قیام کی تجاویز بھی زیر غور آئیں۔
اجلاس میں ورک پلیس ہراسانی سے متعلق قوانین کو مزید سخت کرنے اور شکایات کے عمل کو خفیہ رکھنے کے لیے قانونی ترامیم تجویز کرنے کی ہدایت کی گئی۔ اسی طرح صوبے میں چائلڈ لیبر کے خاتمے اور متاثرہ بچوں کو تعلیم کے دھارے میں شامل کرنے کے لیے خصوصی اسکیم تیار کرنے پر بھی زور دیا گیا۔ آئی ٹی کے شعبے میں جدید منصوبوں کے تحت ڈرون سنٹر آف ایکسیلنس، سائبر سیکیورٹی آپریشن سنٹر اور ضم اضلاع میں ڈیجیٹل سٹی کے قیام کی تجاویز پیش کی گئیں، جبکہ نوجوانوں کے لیے ڈیجیٹل انٹرنشپ پروگرام اور ٹیکنالوجی انکیوبیشن سنٹرز کے قیام پر بھی غور کیا گیا۔
معدنیات کے شعبے میں جیولوجیکل میپنگ، پلیسر گولڈ ایکسپلوریشن اور کریٹیکل منرلز کے لیے انٹیگریٹڈ جیو سائنس سروے اور ڈیٹا ریپازیٹری کے قیام کی تجاویز سامنے آئیں۔ اس کے ساتھ ساتھ مائننگ والے علاقوں میں شجر کاری بڑھانے اور ضم اضلاع میں مائنز ریسکیو، سیفٹی اور ٹریننگ سنٹرز کو مضبوط بنانے کے لیے بھی منصوبے تجویز کیے گئے۔ وزیر اعلیٰ نے متعلقہ محکموں کو ہدایت کی کہ تمام مجوزہ منصوبوں کو قابلِ عمل بنا کر ترجیحی بنیادوں پر اے ڈی پی میں شامل کیا جائے تاکہ صوبے میں پائیدار ترقی اور روزگار کے مواقع کو فروغ دیا جا سکے۔
