امیر اللہ خان یفتالی فاؤنڈیشن کے زیرِ نگرانی لاسپور کے تاریخی پولو گراؤنڈ ہرچین میں تین روزہ امیر اللہ خان یفتالی پولو کپ 2026 کا انعقاد کیا جا رہا ہے۔ اس منفرد اور روایتی کھیلوں کے میلے میں وادی لاسپور کے علاوہ اوی، سنوغر، مستوج اور چوینچ سے تعلق رکھنے والے نامور اور باصلاحیت پولو کھلاڑی شرکت کریں گے۔
یہ پولو کپ صرف ایک کھیلوں کا مقابلہ نہیں بلکہ چترال میں فری اسٹائل پولو کی شاندار روایت، ثقافتی ورثے اور مقامی کھیلوں کی شناخت کو زندہ رکھنے کی ایک بامقصد کاوش ہے۔ اس ایونٹ کا مقصد نوجوان پولو کھلاڑیوں کو اپنی صلاحیتوں کے اظہار کے مواقع فراہم کرنا، ان کی حوصلہ افزائی کرنا اور فری اسٹائل پولو کے فروغ کے لیے ایک مضبوط پلیٹ فارم مہیا کرنا ہے۔
اس سلسلے میں لاسپور پولو ایسوسی ایشن کے کھلاڑیوں، سابق پولو پلیئرز اور کھیل سے وابستہ شخصیات نے ہرچین ہیریٹیج میوزیم میں خصوصی نشست میں شرکت کی، جہاں امیر اللہ خان یفتالی پولو کپ کو کامیاب بنانے، مقامی پولو کے فروغ اور نوجوان کھلاڑیوں کی حوصلہ افزائی کے حوالے سے تفصیلی تبادلۂ خیال کیا گیا۔
شرکاء نے امیر اللہ خان یفتالی مرحوم کی چترال میں فری اسٹائل پولو کے فروغ کے لیے گراں قدر خدمات کو خراجِ تحسین پیش کرتے ہوئے کہا کہ مرحوم نے پولو کو محض ایک کھیل نہیں بلکہ چترال کی ثقافتی شناخت، روایات اور نوجوان نسل کے جذبے سے جوڑنے میں اہم کردار ادا کیا۔ ان کی خدمات آج بھی پولو کے میدانوں میں زندہ ہیں اور ان کے نام سے منعقد ہونے والا یہ کپ اسی ورثے کو آگے بڑھانے کی ایک خوبصورت مثال ہے۔
شرکاء کا کہنا تھا کہ امیر اللہ خان یفتالی پولو کپ 2026 فری اسٹائل پولو کے کھلاڑیوں کے لیے نہ صرف اپنی صلاحیتیں منوانے کا بہترین موقع ہے بلکہ اس سے چترال کے روایتی پولو کو نئی نسل تک منتقل کرنے اور مقامی سطح پر اس کھیل کو مزید منظم انداز میں فروغ دینے میں بھی مدد ملے گی۔
اس موقع پر معروف پولو پلیئرز اور سابق کھلاڑیوں نے نوجوان پولو کھلاڑیوں کو خراجِ تحسین پیش کرتے ہوئے کہا کہ چترال میں فری اسٹائل پولو کی روایت صدیوں پر محیط ثقافتی ورثے کا حصہ ہے، جس کے تحفظ اور فروغ کے لیے کھلاڑیوں، پولو ایسوسی ایشنز، سماجی اداروں اور کمیونٹی کو مشترکہ کردار ادا کرنا ہوگا۔
امیر اللہ خان یفتالی فاؤنڈیشن کی جانب سے اس پولو کپ کا انعقاد اس عزم کا اظہار ہے کہ کھیل، ثقافت اور مقامی روایات کو فروغ دے کر نوجوان نسل کو مثبت سرگرمیوں سے جوڑا جائے اور چترال کے تاریخی کھیل فری اسٹائل پولو کو قومی اور بین الاقوامی سطح پر مزید اجاگر کیا جائے۔
تین روزہ یہ پولو کپ نہ صرف شائقینِ پولو کے لیے ایک یادگار کھیلوں کا ایونٹ ہوگا بلکہ لاسپور کی تاریخی پولو روایت، مقامی ثقافت اور امیر اللہ خان یفتالی مرحوم کی کھیلوں کے لیے خدمات کو خراجِ عقیدت پیش کرنے کا ایک خوبصورت موقع بھی ثابت ہوگا۔
