پشاور: سری لنکا میں منعقدہ ساؤتھ ایشیا فل کنٹیکٹ شن کیوکوشن کراٹے چیمپئن شپ میں گولڈ اور سلور میڈل جیتنے والے خیبرپختونخوا کے نوجوان کھلاڑی شمس العارفین کے اعزاز میں خصوصی تقریب منعقد ہوئی، جس میں ان کی بین الاقوامی سطح پر شاندار کارکردگی کو سراہا گیا۔
تقریب کے دوران ڈائریکٹر جنرل سپورٹس خیبرپختونخوا اشفاق احمد خان نے شمس العارفین کو خصوصی ٹرافی پیش کی اور انہیں دو بین الاقوامی تمغے جیتنے پر مبارکباد دی۔ اس موقع پر فل کنٹیکٹ کراٹے ایسوسی ایشن خیبرپختونخوا کے صوبائی صدر صاحبزادہ الہادی اور صوبائی وائس چیئرمین ملک جی بھی موجود تھے۔
ڈی جی سپورٹس نے کہا کہ شمس العارفین نے بین الاقوامی مقابلے میں نمایاں کامیابی حاصل کرکے ملک اور صوبے کا نام روشن کیا ہے۔ انہوں نے نوجوان کھلاڑی کی محنت، صلاحیت اور عزم کو سراہتے ہوئے مستقبل میں مزید کامیابیوں کے لیے نیک خواہشات کا اظہار کیا۔
واضح رہے کہ شمس العارفین نے مذکورہ چیمپئن شپ میں انفرادی کاتا کے مقابلے میں گولڈ جبکہ کمیٹے میں سلور میڈل حاصل کیا تھا۔
