پشاور: نیشنل ورکشاپ بلوچستان کے ایک وفد نے پشاور کا دورہ کیا، جس میں مختلف شعبہ ہائے زندگی اور مکتبہ فکر سے تعلق رکھنے والے خواتین و حضرات شامل تھے۔ دورے کے دوران وفد کو صوبے کی مجموعی سیکیورٹی صورتحال، انسدادِ دہشت گردی کی حکمت عملی اور بارڈر مینجمنٹ سے متعلق تفصیلی بریفنگ دی گئی۔
وفد نے لیفٹیننٹ جنرل عمر احمد بخاری سے ملاقات کی، جس میں قومی اور علاقائی سلامتی، دہشت گردی کے خلاف اقدامات اور سرحدی امور پر تبادلہ خیال کیا گیا۔
بعد ازاں وفد نے گورنر ہاؤس پشاور کا دورہ کیا، جہاں فیصل کریم کنڈی سے ملاقات ہوئی۔ گورنر نے وفد کو صوبے کی موجودہ سیاسی صورتحال، امن و امان، سیکیورٹی چیلنجز اور حکومتی اقدامات پر تفصیلی بریفنگ دی۔
وفد کے ارکان نے دورے کے دوران یادگارِ شہداء پر حاضری بھی دی اور ملکی دفاع و امن کے لیے جانوں کا نذرانہ پیش کرنے والے شہداء کو خراجِ عقیدت پیش کیا۔
وفد کے شرکاء نے ملاقاتوں کو انتہائی معلوماتی اور مؤثر قرار دیتے ہوئے کہا کہ کور کمانڈر نے انہیں آگاہ کیا کہ پاک فوج خیبر پختونخوا میں درپیش سیکیورٹی خطرات سے کس طرح نمٹ رہی ہے۔
شرکاء کا کہنا تھا کہ کور کمانڈر اور گورنر خیبر پختونخوا کے ساتھ ہونے والے تفصیلی سیشنز میں سیکیورٹی صورتحال، سرحدی امور، دہشت گردی کے چیلنجز اور قومی سلامتی سے متعلق تمام اہم پہلوؤں پر جامع بریفنگ دی گئی، جس سے ان کی معلومات میں نمایاں اضافہ ہوا۔
وفد کے ارکان نے مزید کہا کہ گورنر خیبر پختونخوا نے تمام سوالات، بشمول مشکل سوالات، کے کھلے دل اور واضح انداز میں جواب دیے، جس سے مختلف معاملات سے متعلق پائے جانے والے کئی ابہامات دور ہوئے۔
شرکاء کے مطابق اس دورے نے بالخصوص بلوچستان اور خیبر پختونخوا کو درپیش سیکیورٹی چیلنجز اور خطے میں امن و استحکام کے لیے کی جانے والی کوششوں کو بہتر انداز میں سمجھنے کا موقع فراہم کیا۔
