راولپنڈی (ویب ڈیسک): پاک فوج کے شعبہ تعلقات عامہ (آئی ایس پی آر) کے مطابق پاکستان اور مصر کی افواج کے درمیان انسداد دہشت گردی کی کارروائیوں پر مبنی دو ہفتے طویل مشترکہ مشق “تھنڈر-II” خیبر پختونخوا کے علاقے چراٹ میں کامیابی کے ساتھ مکمل ہو گئی۔
آئی ایس پی آر کے مطابق اس مشق کا مقصد مشترکہ تربیت کے ذریعے انسداد دہشت گردی سے متعلق آپریشنز، طریقہ کار اور تکنیکوں کو مزید بہتر بنانا اور دونوں ممالک کے درمیان باہمی تعاون کو فروغ دینا تھا۔ مشق میں پاک فوج کے اسپیشل سروسز گروپ (SSG) اور مصری اسپیشل فورسز کی جنگی ٹیموں نے بھرپور حصہ لیا اور پیشہ ورانہ مہارت اور آپریشنل صلاحیتوں کا شاندار مظاہرہ کیا۔اختتامی تقریب میں اسپیشل سروسز گروپ کے جنرل آفیسر کمانڈنگ نے بطور مہمان خصوصی شرکت کی، جبکہ مصری پیراٹروپرز کے کمانڈر میجر جنرل محمد سعد عبدالرازق اور مصر کے دفاعی اتاشی بھی اس موقع پر موجود تھے۔
آئی ایس پی آر کے مطابق اس مشترکہ مشق سے پاکستان اور مصر کے درمیان دیرینہ اور تاریخی عسکری تعلقات کو مزید مستحکم بنانے میں مدد ملے گی۔
