وانا میں ’معرکۂ حق‘ کو ایک سال مکمل ہونے کے موقع پر شاندار اور پروقار تقریب کا انعقاد کیا گیا، جس میں فرنٹیئر کور خیبرپختونخوا (ساؤتھ) کے انسپکٹر جنرل نے بطور مہمانِ خصوصی شرکت کی۔ تقریب کا آغاز پرچم کشائی کی باوقار تقریب سے ہوا، جس میں قبائلی عمائدین اور کیڈٹ کالج وانا کے طلباء نے قومی پرچم لہرایا اور قومی ترانہ پیش کیا۔ اس موقع پر فضا “پاکستان زندہ باد” اور “افواجِ پاکستان پائندہ باد” کے نعروں سے گونج اٹھی۔
تقریب میں افواجِ پاکستان، ضلعی انتظامیہ، قبائلی مشران، علماء کرام، مختلف شعبہ ہائے زندگی سے تعلق رکھنے والے عمائدین اور خواتین نے بڑی تعداد میں شرکت کی۔ شرکاء نے ’معرکۂ حق‘ کی کامیابی، وزیرستان کے قبائل اور سیکیورٹی فورسز کی قربانیوں، قومی یکجہتی اور دفاعِ وطن کے جذبے کو اجاگر کیا۔ قبائلی مشران اور عمائدین نے اپنے خطابات میں امن و استحکام کے قیام کے لیے افواجِ پاکستان کی خدمات اور قربانیوں کو خراجِ تحسین پیش کرتے ہوئے اس عزم کا اظہار کیا کہ ملک کی سلامتی، ترقی اور استحکام کے لیے قبائل اور عوام سیکیورٹی اداروں کے ساتھ مکمل تعاون جاری رکھیں گے۔ تقریب کے اختتام پر ملکی سلامتی، شہداء کے بلند درجات اور پاکستان کی ترقی و خوشحالی کے لیے خصوصی دعائیں بھی کی گئیں۔
