پشاور: پراونشل ڈیزاسٹر مینجمنٹ اتھارٹی (پی ڈی ایم اے) نے گزشتہ 48 گھنٹوں کے دوران صوبے میں ہونے والی تیز بارشوں اور فلش فلڈ سے ہونے والے نقصانات کی رپورٹ جاری کر دی ہے، جس کے مطابق مختلف حادثات میں اب تک 12 افراد جاں بحق جبکہ 18 زخمی ہو چکے ہیں۔
پی ڈی ایم اے کے مطابق جاں بحق ہونے والوں میں 5 مرد، 5 بچے اور 2 خواتین شامل ہیں، جبکہ زخمیوں میں 10 مرد، 4 خواتین اور 4 بچے شامل ہیں۔
رپورٹ کے مطابق شدید بارشوں اور سیلابی ریلوں کے باعث مجموعی طور پر 18 گھروں کو نقصان پہنچا، جن میں 15 گھروں کو جزوی جبکہ 3 گھروں کو مکمل طور پر تباہ ہونے کی اطلاع ہے۔
پی ڈی ایم اے نے بتایا کہ یہ حادثات پشاور، نوشہرہ، خیبر، مردان، بونیر، باجوڑ، لوئر و اپر چترال، لوئر و اپر دیر، ایبٹ آباد، مانسہرہ، تورغر، کرم اور شمالی وزیرستان سمیت مختلف اضلاع میں پیش آئے۔
ترجمان کے مطابق پی ڈی ایم اے، ریسکیو 1122، ضلعی انتظامیہ اور دیگر متعلقہ ادارے باہمی رابطے میں ہیں اور متاثرہ علاقوں میں امدادی کارروائیاں جاری ہیں۔ متاثرہ اضلاع کی انتظامیہ کو ہدایت کی گئی ہے کہ متاثرین کو فوری امدادی سامان اور ہر ممکن معاونت فراہم کی جائے۔
پی ڈی ایم اے کے مطابق اس وقت صوبے کے تمام دریاؤں اور ندی نالوں میں پانی کی سطح اور بہاؤ معمول کے مطابق ہے، تاہم بارشوں کا سلسلہ 23 جولائی تک وقفے وقفے سے جاری رہنے کا امکان ہے۔ اس حوالے سے تمام ضلعی انتظامیہ کو پہلے ہی الرٹ جاری کیا جا چکا ہے۔
ڈی جی پی ڈی ایم اے نے شہریوں سے اپیل کی ہے کہ غیر ضروری سفر سے گریز کریں، حساس سیاحتی مقامات کا رخ نہ کریں اور متعلقہ حکومتی اداروں کی جانب سے جاری کردہ الرٹس اور ایڈوائزریز پر عمل کریں۔
پی ڈی ایم اے کا ایمرجنسی آپریشن سینٹر مکمل طور پر فعال ہے، جبکہ عوام کسی بھی ہنگامی صورتحال، موسمی معلومات یا امداد کے لیے فری ہیلپ لائن 1700 پر رابطہ کر سکتے ہیں۔
