محکمہ پبلک ہیلتھ انجینئرنگ خیبرپختونخوا نے عوام کو بہتر اور شفاف خدمات کی فراہمی کے لیے جدید موبائل ایپ متعارف کرا دی، جس کا باضابطہ افتتاح صوبائی وزیر فضل شکور خان نے کیا۔ افتتاحی تقریب کے دوران صوبائی وزیر کو ایپ کے فیچرز اور عوام کو فراہم کی جانے والی سہولیات کے بارے میں تفصیلی بریفنگ دی گئی۔ حکام نے بتایا کہ موبائل ایپ کے ذریعے صارفین اپنے پانی کے بل، بقایاجات اور دیگر متعلقہ معلومات آن لائن حاصل کر سکیں گے۔
بریفنگ میں بتایا گیا کہ عوام کی سہولت کے لیے ایپ اردو اور انگریزی دونوں زبانوں میں تیار کی گئی ہے۔ صارفین واٹر سپلائی اور پبلک ہیلتھ انجینئرنگ کی مختلف اسکیموں سے متعلق اپنی شکایات آن لائن درج کرا سکیں گے، جبکہ شکایات پر ہونے والی پیش رفت کو بھی براہِ راست ایپ کے ذریعے ٹریک کیا جا سکے گا۔ اس موقع پر فضل شکور خان نے کہا کہ خیبرپختونخوا حکومت ڈیجیٹل گورننس کے فروغ کے لیے عملی اقدامات کر رہی ہے اور جدید ٹیکنالوجی کے ذریعے عوام کو بروقت، معیاری اور شفاف خدمات کی فراہمی حکومت کی اولین ترجیح ہے۔
انہوں نے کہا کہ نئی موبائل ایپ محکمہ کی کارکردگی، شفافیت اور جوابدہی کو مزید مضبوط بنائے گی۔ صوبائی وزیر نے متعلقہ حکام کو ہدایت کی کہ عوامی شکایات کے فوری ازالے کو ہر صورت یقینی بنایا جائے اور ایپ میں مزید جدید سہولیات شامل کی جائیں تاکہ شہری زیادہ سے زیادہ مستفید ہو سکیں۔ انہوں نے اس عزم کا اظہار کیا کہ عوام دوست اقدامات کے ذریعے محکمہ پبلک ہیلتھ انجینئرنگ کو جدید تقاضوں سے ہم آہنگ بنایا جا رہا ہے۔
