فریش واٹر ایکشن نیٹ ورک ساؤتھ ایشیاء پاکستان کے خیبر پختونخوا چیپٹر کے تعاون سے اور آئی آر ایس پی کے زیر اہتمام مردان کے ایک مقامی ہال میں “واش (WASH) کے لیے کلائمنٹ فنانسنگ کو فروغ دیں، آب و ہوا، پانی اور صفائی کے موسمیاتی لچکدار بنیادی ڈھانچے میں فنڈنگ اور سرمایہ کاری میں اضافے کا وکیل بنیں” کے موضوع پر ایک روزہ آگاہی و تربیتی ورکشاپ کا انعقاد کیا گیا۔ورکشاپ میں مرد و خواتین، طلبہ و طالبات، سماجی کارکنان اور مختلف شعبہ ہائے زندگی سے تعلق رکھنے والے افراد نے کثیر تعداد میں شرکت کی۔
پروگرام کا مقصد موسمیاتی تبدیلیوں کے بڑھتے ہوئے اثرات کے تناظر میں پانی، صفائی اور حفظانِ صحت (WASH) کے شعبے میں پائیدار منصوبہ بندی، موسمیاتی لچکدار انفراسٹرکچر کی تعمیر، اور کلائمنٹ فنانسنگ کے مواقع سے متعلق شرکاء میں آگاہی پیدا کرنا تھا۔ورکشاپ سے خطاب کرتے ہوئے آئی آر ایس پی کے محمد اسماعیل، گلناز رقیب اور نوشین سردار نے کہا کہ موسمیاتی تبدیلی کے باعث پانی اور صفائی کے نظام کو سنگین چیلنجز کا سامنا ہے، لہٰذا ضروری ہے کہ حکومت، ترقیاتی ادارے، نجی شعبہ اور سول سوسائٹی مل کر اس شعبے میں سرمایہ کاری کو فروغ دیں تاکہ محفوظ پانی، بہتر صفائی اور صحت مند ماحول کی فراہمی کو یقینی بنایا جا سکے۔
مقررین نے اس بات پر بھی زور دیا کہ کلائمنٹ فنانسنگ کے مؤثر استعمال اور عوامی شمولیت کے ذریعے نہ صرف ماحول دوست ترقی کو فروغ دیا جا سکتا ہے بلکہ مستقبل میں قدرتی آفات اور موسمیاتی خطرات کے اثرات کو بھی کم کیا جا سکتا ہے۔ورکشاپ کے دوران شرکاء کو موسمیاتی تبدیلی، پانی کے وسائل کے مؤثر انتظام، صفائی کے نظام کی بہتری اور پائیدار ترقی سے متعلق مختلف موضوعات پر تفصیلی بریفنگ دی گئی، جبکہ سوال و جواب کے سیشن میں شرکاء نے بھرپور دلچسپی کا اظہار کیا۔پروگرام کے اختتام پر کامیابی سے تربیت مکمل کرنے والے شرکاء میں تعریفی اسناد (سرٹیفکیٹس) بھی تقسیم کیے گئے، جبکہ شرکاء نے ایسی آگاہی ورکشاپس کے تسلسل کو وقت کی اہم ضرورت قرار دیتے ہوئے اس کے انعقاد کو خوش آئند اقدام قرار دیا۔
