پشاور: خیبرپختونخوا اسمبلی سیکرٹریٹ کی جانب سے جاری مراسلے کے مطابق صوبائی اسمبلی کا اجلاس 22 اپریل 2026 بروز بدھ سہ پہر 3 بجے ارباب نیاز کرکٹ اسٹیڈیم (عمران خان کرکٹ اسٹیڈیم) میں منعقد ہوگا۔
مراسلے میں کہا گیا ہے کہ اجلاس اسپیکر خیبرپختونخوا اسمبلی کی ہدایت پر آئین اور قواعد کے تحت حاصل اختیارات کو بروئے کار لاتے ہوئے طلب کیا گیا ہے، جو صوبائی اسمبلی کے طریقہ کار و قواعد 2025 کے مطابق منعقد ہوگا۔
اسپیکر نے ہدایت جاری کی ہے کہ اجلاس کے دوران تمام انتظامی سیکرٹریز کی بروقت حاضری یقینی بنائی جائے تاکہ ایوان کی کارروائی مؤثر اور منظم انداز میں آگے بڑھائی جا سکے۔
مزید برآں اراکین اسمبلی کے لیے فول پروف سکیورٹی انتظامات کو یقینی بنانے کی بھی ہدایت کی گئی ہے، جبکہ مراسلے کی نقول متعلقہ اعلیٰ حکام کو برائے معلومات اور ضروری کارروائی ارسال کر دی گئی ہیں۔
