پشاور: گورنر ہاؤس پشاور میں یوتھ لیڈرشپ پاکستان کے زیرِ اہتمام یوتھ لیڈرشپ کانفرنس کا انعقاد کیا گیا، جس میں فیصل کریم کنڈی نے بطور مہمانِ خصوصی شرکت کی۔
کانفرنس سے خطاب کرتے ہوئے گورنر خیبرپختونخوا نے کہا کہ نوجوانوں کو اپنی زندگیوں میں حوصلہ، برداشت اور مستقبل مزاجی کو اپنانا ہوگا۔ انہوں نے کہا کہ گورنر ہاؤس پشاور سے صوبے کے نوجوانوں کی مکمل رہنمائی اور سرپرستی کی جا رہی ہے تاکہ انہیں مثبت سمت میں آگے بڑھنے کے مواقع فراہم کیے جا سکیں۔
فیصل کریم کنڈی نے نوجوانوں پر زور دیا کہ وہ اپنے خواب بڑے رکھیں، محنت کو اپنا شعار بنائیں اور اپنے اندر خود اعتمادی پیدا کریں۔ ان کا کہنا تھا کہ نوجوان صرف اپنی ذات تک محدود نہ رہیں بلکہ اپنے معاشرے، ملک اور آنے والی نسلوں کے لیے کردار ادا کریں۔
انہوں نے کہا کہ خیبرپختونخوا کے نوجوان ہمیشہ سے بہادری، غیرت اور قیادت کی علامت رہے ہیں، اور یہی خصوصیات انہیں مستقبل میں کامیاب بنائیں گی۔
گورنر نے مزید کہا کہ کامیاب نوجوان محض ایک نعرہ نہیں بلکہ روشن مستقبل کی ذمہ داری کا نام ہے، جبکہ بہترین قیادت وہ ہوتی ہے جو دوسروں کے لیے آسانیاں اور مواقع پیدا کرے۔
