مردان: ریسکیو 1122 مردان کی جانب سے ڈسٹرکٹ ایمرجنسی آفیسر رفیع اللہ مروت کی ہدایت پر ٹریننگ ونگ نے نیو النور ایجوکیشن اکیڈمی تخت بھائی میں طلبہ و طالبات کے لیے ایک روزہ آگاہی و تربیتی سیشن کا انعقاد کیا۔
تقریب کے دوران ادارے کے ایم ڈی خلیل الرحمن، پرنسپل شاہد مہمند اور سینئر صحافی و بانی تخت بھائی پریس کلب حاجی حیات اللہ اختر نے خطاب کرتے ہوئے انسانی خدمت کے جذبے اور بروقت طبی امداد کی فراہمی میں ریسکیو 1122 کے کردار کو سراہا اور ٹیم کو خراجِ تحسین پیش کیا۔
ریسکیو ٹیم نے سیشن کے دوران فرسٹ ایڈ، قدرتی و ناگہانی آفات اور مختلف ہنگامی صورتحال سے نمٹنے کے حوالے سے عملی تربیت فراہم کی۔ شرکاء کو بتایا گیا کہ ایمرجنسی کی صورت میں ریسکیو سروسز سے کیسے رابطہ کیا جائے، جبکہ سانس اور دل کی دھڑکن کی بحالی (CPR)، ڈوبنے، بجلی کا کرنٹ لگنے، زہریلی اشیاء کے استعمال، کتے یا سانپ کے کاٹنے اور دیگر حادثات کی صورت میں فوری امداد کے طریقے بھی سکھائے گئے۔
مزید برآں سیلاب، زلزلہ اور دیگر قدرتی آفات کے دوران حفاظتی تدابیر پر بھی تفصیلی بریفنگ دی گئی۔ سیشن کے اختتام پر سوال و جواب کا سیشن ہوا جس میں طلبہ نے بھرپور دلچسپی کا مظاہرہ کیا اور آگاہی پیغام گھر گھر پہنچانے کے عزم کا اظہار کیا۔
اس موقع پر قاری طفیل، نذر محمد، اویس خان اور احسن احسان بھی موجود تھے۔
